
第一世噶玛巴教言集1KM3རྗེ་དུས་གསུམ་མཁྱེན་པའི་རྣམ་ཐར་བཞུགས་སོ། །
1-2-17b
༄༅། །རྗེ་དུས་གསུམ་མཁྱེན་པའི་རྣམ་ཐར་བཞུགས་སོ། །
༄། །འདས་པའི་སྐྱེས་རབས། ལེའུ་དང་པོ། བཻ་ཌཱུརྱའི་ཞིང་ཁམས་སུ་སྐྱེས་པའི་རབས།
༄༅། །རྗེ་དུས་གསུམ་མཁྱེན་པའི་རྣམ་ཐར་བཞུགས་སོ། །ཐམས་ཅད་མཁྱེན་པ་ལ་ཕྱག་འཚལ་ལོ། །གང་གི་རང་བཞིན་མཁྱེན་བརྩེའི་ཉི་ཟླ་འབར། །རྡུལ་སྙེད་ལུས་ཀྱི་སྤྱི་བོས་དེ་བཏུད་ནས། །འདས་དུས་བཅུ་དང་ད་ལྟར་སྤྲུལ་པ་ལྔ། །མ་འོངས་གསུམ་ནི་དམ་པའི་གསུང་བཞིན་བསྡུ། །དཔལ་ལྡན་རིན་པོ་ཆེ་འདིས་ཐོག་མར་བྱང་ཆུབ་ཏུ་ཐུགས་བསྐྱེད་ཅིང་། བར་དུ་ལམ་རྣམ་པ་ལྔར་ཚོགས་གཉིས་བསགས་ནས། མཐར་
1-2-18a
༄༅། །བླ་ན་མེད་པའི་བྱང་ཆུབ་བརྙེས་པས། སེམས་ཅན་གྱི་ལས་མ་ཟད་ཀྱི་བར་དུ་ཕྲིན་ལས་རྒྱ་ཆེན་པོ་རྒྱུན་ཆད་མེད་པར་མཛད་པ་ཡིན་ཏེ། དེ་ཡང་སྔོན་གྱི་དུས་ན་འཇིག་རྟེན་གྱི་ཁམས་བཻ་ཌཱུརྱ་ཞེས་བྱ་བར་སྐྱེས་པ་དྲན་ཏེ། ལོ་རྒྱུས་མང་པོ་ཡོད་གསུང་ངོ་། །བཻ་ཌཱུརྱའི་ཞིང་ཁམས་སུ་སྐྱེས་པའི་རབས་ཏེ་ལེའུ་དང་པོའོ།། །།
༄། །ལེའུ་གཉིས་པ། གླིང་ཕྲན་དུ་སྐྱེས་པའི་རབས། ལེའུ་གསུམ་པ། གླིང་ཟུར་དུ་སྐྱེས་པའི་རབས། ལེའུ་བཞི་པ། བ་ལང་སྤྱོད་དུ་སྐྱེས་པའི་རབས། ལེའུ་ལྔ་པ། གླང་པོ་ཆེར་སྐྱེས་པའི་རབས།
རེ་ཤིག་ལྷོ་འཛམ་བུའི་གླིང་དང་བ་ལང་སྤྱོད་ཀྱི་བར་ན་གླིང་ཕྲན་དྷ་རི་ཐ་ཞེས་བྱ་བར་སྐྱེས་ནས། བླ་མ་ལྷ་རྗེ་འདི་རྣལ་འབྱོར་པ་སུ་ར་པ་ཞེས་པར་བཞུགས་པ་ལ། ངས་སྨོན་འཇུག་དུ་སེམས་བསྐྱེད་པ་ཞུས་སོ། །གླིང་ཕྲན་དུ་སྐྱེས་པའི་རབས་ཏེ་ལེའུ་གཉིས་པའོ།། །།ལན་ཅིག་ལྷོ་འཛམ་བུའི་གླིང་གི་ནུབ་ཕྱོགས་ཏརྟི་ཏ་ཞེས་པའི་མགར་བའི་རིགས་ཀྱི་རང་བཞིན་གྱི་རྣལ་འབྱོར་པ་ཨནྟི་ཏར་གྱུར་ནས་སློབ་དཔོན་མེད་དེ། རི་ཁྲོད་དང་དགོན་པར་བསྒྲུབ་པ་ལ་བརྩོན་པ་ཆེན་པོ་བྱས་གསུང་། གླིང་ཟུར་དུ་སྐྱེས་པའི་རབས་ཏེ་ལེའུ་གསུམ་པའོ།། །།ཡང་ནུབ་བ་ལང་སྤྱོད་དུ་བྲམ་ཟེའི་རིགས་ཀྱི་དགེ་སློང་དྷརྨ་ཨ་ཏི་ཐ་སྟེ། གསང་མཚན་དྷརྨ་ཤྲཱི་ཞེས་པར་སྐྱེས་ནས། བླ་མ་ཏེ་ལོ་པ་ལ་རྗེས་སུ་གདམས་པ་རྣམས་ཞུས་ཏེ༑ སེམས་ཅན་འགའ་ལ་ཡང་ཕན་བཏགས་གསུང་ངོ་། །བ་ལང་སྤྱོད་དུ་སྐྱེས་པའི་རབས་ཏེ་ལེའུ་བཞི་པ་འོ།། །།ཕྱིས་ནུབ་བ་ལང་སྤྱོད་ན་ད་རེས་ཀྱི་ཡོན་བདག་སྐྱ་དགོན་པ་བ་འདི་མུ་སྟེགས་ཀྱི་སྡིག་སྤྱོད་
1-2-18b
ཀྱི་རྒྱལ་པོ་དྷརྨ་ཤཱི་ལར་སྐྱེས་ནས་རྒྱལ་ཁམས་ལ་གནོད་པས། དེ་འདུལ་བའི་དོན་དུ་དེའི་ནོར་གླང་པོ་ཆེ་བདུན་བརྒྱ་ཡོད་པའི་ནང་ན་སྟོབས་ཆེ་བ་གཅིག་དུ་སྐྱེ་བ་བླངས་ཏེ་གནས་པས། ལན་ཅིག་དམག་གི་དཔུང་ཆེན་པོ་དང་བཅས་པ་ལ་ཆེན་པོ་གཅིག་ལ་སོང་བའི་ལམ་དུ་རྒྱལ་པོས་གླང་པོ་ཆེ་ལ་ཞོན་པས་དེར་བརྫིས་ནས་བསད་པས། ཕྱིས་སྐྱེ་བ་འགར་ངས་དགེ་བ་ལ་བཀོད་གསུང་ངོ་། །གླང་པོ་ཆེར་སྐྱེས་པའི་རབས་ཏེ་ལེའུ་ལྔ་པའོ།། །།
༄། །ལེའུ་དྲུག་པ། འཛམ་བུའི་གླིང་གི་མཐར་སྐྱེས་པའི་རབས། ལེའུ་བདུན་པ། ཡུལ་ཀ་ལིང་ཀར་སྐྱེས་པའི་རབས།
ཡང་འཛམ་བུ་གླིང་གི་བྱང་མཐའ་ཟད་པའི་བྱང་ཤར་གྱི་མཚམས་ན་ཆུ་ཀླུང་པད་མས་བརྒྱན་པ་ཞེས་བྱ་བར་བྲམ་ཟེ་སརྫ་ནའི་མཁན་བུ་དགེ་སློང་དྷརྨ་ཀཱིརྟིར་སྐྱེ་བ་བཞེས། རི་བྱ་སྐྱིབས་ཅན་དུ་སློབ་དཔོན་ཌོམྦི་པ་ལ་གསོལ་བ་བཏབ། ངའི་མཁན་བུ་ཡང་དགེ་བཤེས་བརྩོན་འགྲུས་ཤེས་རབ་དང་རིན་ཆེན་རྒྱལ་མཚན་དང་མདོག་མཁས་པ་དང་སྨེན་ཀེ་ཇོ་སྲས་བཞི་ཡིན། དགེ་བཤེས་ཕྱ་པ་པཎྜི་ཏ་ཆུང་ངུ་གཅིག་གིས་སློབ་དཔོན་བྱས། དགེ་བཤེས་རྡོ་རྗེ་སེང་གེ་ཕྱ་པའི་སློབ་མ་ཡིན། ད་དུང་ཡང་ཁོང་གི་དྲུང་དུ་སྐྱེ་བར་འདུག་གསུང་། འཛམ་བུའི་གླིང་གི་མཐར་སྐྱེས་པའི་རབས་ཏེ་ལེའུ་དྲུག་པའོ།། །།དེ་ནས་ཡུལ་ཀ་ལིང་ཀར་རྒྱལ་པོ་ཟླ་བ་རྣམ་པར་གནོན་པ་ཞེས་བྱ་བར་སྐྱེས། དེའི་སློབ་དཔོན་སངས་རྒྱས་ཡེ་ཤེས་ཞབས་ཏེ། བླ་མ་ལྷ་རྗེ་ཡིན། དེའི་སློབ་དཔོན་འཇམ་དཔལ་བཤེས་གཉེན་ཨ་བ་
1-2-19a
༄༅། །དྷཱ་ཏི་སྟེ། རྗེ་བཙུན་མིད་ལ་ཡིན། གསང་འདུས་ཀྱི་ལོ་རྒྱུས་དང་མི་མཐུན། རྒྱལ་པོས་རྒྱ་གར་ལྷོ་ཕྱོགས་ཀྱི་དཔལ་ལྡན་འབྲས་སྤུངས་ཀྱི་མཆོད་རྟེན་ལ་བསྐོར་བ་ལ་ཕྱིན་པའི་ལམ་དུ། ནམ་མཁའ་ལ་སྒྲ་གཅིག་ན་རེ། ཁྱོད་ད་རུང་དངོས་གྲུབ་མི་ཐོབ་པས་ཕྱིར་ལོག་ལ་འདུས་བྱས་ཀྱི་དགེ་བ་གྱིས་ཟེར་བ་ཐོས། དེར་དགེ་འདུན་གྱི་སྡེ་བཙུགས་ཏེ་འདུས་བྱས་ཀྱི་དགེ་བ་མང་དུ་བྱས་ནས་སླར་མཆོད་རྟེན་ལ་བསྐོར་བ་མང་པོ་མཛད་པས་ཐུན་མོང་གི་དངོས་གྲུབ་མ་ལུས་པ་ཐོབ། སྔར་འགྲོ་དུས་སུ་ཁྱི་གཉིས་ཕྱི་ལ་འབྲངས་པས་ཀྱང་ཐུན་མོང་གི་དངོས་གྲུབ་ཐོབ་ནས། ད་ལྟ་ཨཽ་རྒྱན་ན་འཇིག་རྟེན་གྱི་མཁའ་འགྲོ་མ་གཞན་པས་གདུག་རྩུབ་ཆེ་བ་གཉིས་སུ་སྐྱེས་ནས་ཡོད། དེ་དུས་ཀྱི་རྒྱལ་པོའི་འཁོར་དང་ཀརྟི་ཀ་དང་ས་སྨད་ཀྱི་མི་མང་པོ་འདི་ན་ཡོད། དེའི་ཚེ་སྟོན་པ་སངས་རྒྱས་དང་། དགེ་བཤེས་རིན་ཆེན་རྒྱལ་མཚན་གཉིས་ལ་ཐུན་མོང་གི་དངོས་གྲུབ་མང་པོ་ཡོད། ད་ལྟ་མེད་པ་ནི་དེ་དུས་ཀྱི་བསྒྲུབས་པའི་ཡིན་པས་ལན། དུས་དེར་ཁྱེད་བཅུ་གསུམ་གྱིས་སྔ་ཕྱིར་གསོལ་བ་ཐེབས་ཏེ། སྟོན་པ་སངས་རྒྱས་དང་། རིན་ཆེན་རྒྱལ་མཚན་དང་། ཡོན་ཏན་འོད་དང་། ཡོན་ཏན་བླ་མ་དང་། དགེ་འདུན་གྲགས་དང་། སྨོན་ལམ་བླ་མ་རྣམས་དབུས་ན་ཡོད་ལ། ཏྲེ་ན་ཡང་གཅིག་ཡོད་གསུང་། ཡུལ་ཀ་ལིང་ཀར་སྐྱེས་པའི་རབས་ཏེ་ལེའུ་བདུན་
1-2-19b
པའོ།། །།
༄། །ལེའུ་བརྒྱད་པ། ཨཽ་རྒྱན་དུ་སྐྱེས་པའི་རབས། ལེའུ་དགུ་པ། ཤར་ལུས་འཕགས་པོ་སྐྱེས་པའི་རབས།
དེའི་རྗེས་ལ་འཛམ་བུ་གླིང་གི་དབུས་ནུབ་ཀྱི་ཕྱོགས་ཨཽ་རྒྱན་དུ། བླ་མ་ཏེ་ལོ་པའི་སློབ་མ་ནུས་པ་མཆོག་ཏུ་གྱུར་པའི་རྣལ་འབྱོར་པ་ཤཱི་ལ་དནྟི་ཞེས་བྱ་བ་ཚལ་དང་ནགས་ན་གནས་པ་ཡིན། དེའི་ཚེ་ན་ངས་དབང་བསྐུར་བའི་སློབ་མ་བཞི་ད་ལྟ་འདི་ན་ཡོད། རྡོ་རྗེ་འབུམ་དང་། བསྒོམ་སྔོན་དང་། ཤཱཀྱ་ཤེས་རབ་དང་། ཆོས་དཔལ་བཞི་ཡིན་གསུང་ངོ་། །ཨཽ་རྒྱན་དུ་སྐྱེས་པའི་རབས་ཏེ་ལེའུ་བརྒྱད་པ་འོ།། །།དེའི་ཕྱིས་ཤར་ལུས་འཕགས་པོའི་གླིང་དུ་ཡབ་རྒྱལ་པོ་དགེ་བ་བཟང་པོ་དང་། ཡུམ་ཤེས་རབ་ཅན་མའི་སྲས་མོ་ཤེས་རབ་བཟང་མོར་སྐྱེས། གསང་མཚན་མཚོ་སྐྱེས་བྱང་ཆུབ་ཡིན། བུར་སྐྱེས་ན་རྒྱལ་ས་འཛིན་དགོས་པས་འཇིགས། ཡབ་ཡུམ་ཆུང་ངུ་ནས་ཤི་སྟེ། བླ་མ་ལྷ་རྗེ་འདི་དགེ་སློང་དྷརྨ་སིདྷི་ཞེས་པར་ཡོད་པ་དང་མཇལ་ནས། ཡོ་བྱད་མང་པོ་བླ་མ་ལ་ཕུལ་ཏེ། དགེ་བསྙེན་མའི་སྡོམ་པ་མནོས་ནས་བསླབ་བྱ་ཚུལ་བཞིན་བསྲུངས། དེའི་ཚེ་ཁྱེད་མང་པོ་དང་ངའི་གྲོགས་པོ་མང་པོ་ཡང་ཡོད། ཚོགས་གསོག་གཅིག་གི་དུས་ན། ཕ་དགེ་བ་གྲགས་དང་། མ་དགེ་བ་བཟང་མོའི་བུ་ཁྱེད་སྤུན་བདུན་ཡོད། དགེ་འདུན་འོད་དང་། ཤེས་རབ་བླ་མ་དང་། སྨོན་ལམ་བླ་མ་དང་། ཡོན་ཏན་འོད་དང་། ཡེ་ཤེས་འོད་དང་། ཡེ་ཤེས་འོད་ཟེར་དང་། གཞན་གཅིག་དང་བདུན་ཏེ་སྔ་མ་གསུམ་གྱི་ངའི་སྲོག་གི་རོགས་ཀྱང་བྱས་གསུང་ངོ་། །ཤར་ལུས་
1-2-20a
༄༅། །འཕགས་པོ་སྐྱེས་པའི་རབས་ཏེ་ལེའུ་དགུ་པའོ།། །།
༄། །ལེའུ་བཅུ་པ། གླིང་ཕྲན་གྱི་སྐྱེས་པའི་རབས།
སྐྱེ་བ་འདིའི་སྔ་མ་ལ་ཤར་ལུས་འཕགས་པོ་དང་། ལྷོ་འཛམ་བུ་གླིང་གཉིས་ཀྱི་བར་ན་གླིང་ཕྲན་མིང་ཅན་མེད་པའི་གླིང་གི་གྲོང་ཁྱེར་ར་དྷ་པ་འམ༑ རཱ་ཛ་ཕ་ལ་སྟེ་རྒྱལ་པོ་བཟང་པོའི་གྲོང་ཁྱེར་ཞེས་བྱ་བར་ཡབ་རྗེའུ་རིགས་དྷརྨ་སྦས་པ་དང་། ཡུམ་སུ་མ་ཏིའི་སྲས་སུ་པ་ཏི་ཀིརྡིར་སྐྱེས་ནས་ལོ་བརྒྱ་དྲུག་བཅུ་རྩ་བཞི་ཐུབ། དེ་ནས་བླ་མ་ལྷ་རྗེ་དཔལ་གྱི་སྦས་པར་ཡོད་པ་ལ་མ་ཧཱ་མ་ཡ་དང་། སྒྲོལ་མ་ཡིད་བཞིན་འཁོར་ལོ་དང་། རྡོ་རྗེ་སེམས་དཔའི་སྒྲུབ་ཐབས་ཞུས། ཡོན་ཏན་འོད་དང་དགེ་འདུན་འོད་དང་ཡེ་ཤེས་བླ་མ་དང་སྨོན་ལམ་བླ་མ་དང་འབྱུང་གནས་བླ་མ་དང་རྒྱལ་མཚན་བླ་མ་དང་རྩང་སྟོན་ཚུལ་སེང་དང་དྲེའི་དགེ་བཤེས་དཀོན་མཆོག་དཔལ་དང་རྡོ་རྗེ་ཤེས་རབ་དང་བཀའ་གདམས་པ་གཅིག་དང་བཅུ་ལ་ངས་སྒྲོལ་མ་དེ་བཤད། ངས་བླ་མ་ལྷ་རྗེ་ལ་ཚོགས་འཁོར་གཅིག་ཞུས་པའི་ཚེ་ཁྱེད་ཉི་ཤུ་ཙམ་ཡོད་དེ། དགེ་བཤེས་བཀའ་གདམས་པ་དང་། སློབ་དཔོན་རིན་ཆེན་རྒྱལ་མཚན་དང་། སྟོན་པ་སངས་རྒྱས་དང་། ཉེ་གནས་གཉིས་དང་། དགེ་འདུན་གྲགས་དང་། སྨོན་ལམ་བླ་མ་དང་། རྡོ་རྗེ་ཤེས་རབ་དང་། དགེ་ཤེས་དཀོན་མཆོག་དཔལ་དང་། སྟོན་པ་ཚུལ་སེང་དང་། བཙུན་མ་གཉིས་ཀྱང་ཡོད་པས་གཅིག་ས་དེ་ཉིད་དུ་ཡོད་ལ། གཅིག་ནི་དབུས་སུ་སྐྱེས། ཡོན་བདག་
1-2-20b
དགོན་པ་བ་འདི་ཁྱིམ་བདག་ཕྱུག་པོ་གཅིག་གི་བུ་ཡིན་པས་ཡོན་བདག་བྱས་ནས། དེ་ནས་འབྲེལ་ཀ་བྱས་ཏེ་སྐྱེ་བ་འདིར་ཡང་བྱས། ཕྱི་མར་ཡང་བྱེད། མཁན་པོ་ཀ་བྲག་པས་ངའི་མཁན་པོ་ལན་གཉིས་མཛད་དེ༑ སྐྱེ་བ་དེ་རང་དགེ་སློང་རཏྣ་ཤཱི་ལ་ཡིན། སློབ་མ་བཀའ་གདམས་པ་ལ་སོགས་པ་ལ་ཆོས་དབང་གི་རབ་བྱེད་བཤད་པས་དེས་ཡང་ཡང་ཕན་ཐོགས་ཏེ་ངས་སྤྱོད་པ་ནུས་པའི་རྣལ་འབྱོར་པ་ཡིན། དགེ་བཤེས་ས་ནག་པ་དང་ཡུལ་བར་པ་དང་གཞན་གཅིག་དང་གསུམ་ལ་སྐྱབས་འགྲོ་དང་འཇུག་པ་སེམས་བསྐྱེད་བྱས། གཅིག་གིས་བསླབ་བྱ་མ་བསྲུངས་པས་ད་ལྟ་དེ་ཉིད་ན་སྐྱེས་ནས་ཡོད། མཁས་ཆེན་ནི་པཎྜི་ཏ་ཡིན་པས་བྱང་ཆུབ་སེམས་པའི་ས་དང་སྡོམ་པ་ཉི་ཤུ་པ་བཤད། དགེ་བཤེས་བླ་མ་འོད་ནི་མདོ་སྨད་སེ་ཚང་བྱ་བའི་བཟང་པོ་དེར་སྐྱེས་རྒྱ་གར་གྱི་འགྲམ་ཡིན། དེ་ན་ཁོའི་སྐྱེ་བ་སྔ་མའི་སློབ་དཔོན་གཅིག་ཡོད། གྲུབ་ཐོབ་ཟེར་ཉན་གཅིག་ཡིན་གསུང་། གླིང་ཕྲན་གྱི་སྐྱེས་པའི་རབས་ཏེ་ལེའུ་བཅུ་པའོ། །འདས་པའི་སྐྱེས་རབས་སོ།། །།
༄། །ལེའུ་བཅུ་གཅིག་པ། སྐྱེ་བ་འདིར་དཀའ་སྤྱད་དང་གཞན་དོན་གྱི་ལོ་གྲངས།
སྐྱེ་བ་འདིར་ནི་མི་མཇེད་ཀྱི་འཇིག་རྟེན་གྱི་ལྟེ་བའི་ལྷོ་ཕྱོགས་འཛམ་བུ་གླིང་གི་བྱང་ངོས་ཁ་བ་ཅན་གྱི་སའི་སྨད་ཀྱི་ཆ་ཡུལ་ཏྲེ་ཤོད་གངས་ཀྱི་ར་བ་སྤོ་ཆུ་ལྷ་ལྡོང་དཀར་པོར། ཡབ་བསྒོམ་པ་འཕེལ་དང་། ཡུམ་མིང་འདྲེན་གྱི་སྲས་དགེ་འཕེལ་དུ་སྐུ་བལྟམས་ནས་ལོ་བཅུ་གཅིག་ནས་དཔལ་ལྷ་མོ་
1-2-21a
༄༅། །བསྒྲུབས་པས་ཞལ་མཐོང་ཞིང་། དགྲ་བཏུལ་ནས། སླར་ཤཱཀྱ་སེང་གེའི་བསྟན་པའི་གཟུགས་བརྙན་ལོ་ལྔ་བརྒྱ་ཕྲག་བཅུ་གནས་པའི་དུས་འདིར་གཞན་དོན་བྱ་བར་དགོངས་ནས། དགུང་ལོ་བཅུ་དྲུག་ལ་ཀ་བྲག་ཏུ་དགེ་བཤེས་མཆོག་གི་བླ་མ་ལ་དགེ་ཚུལ་མཛད་ནས། ལོ་བཅུ་གཉིས་མཁན་པོའི་ཞབས་ཏོག་བྱས། དགེ་བཤེས་ཀྲ་ར་བ་ལ་བདེ་མཆོག་གི་དབང་བསྐུར་ཞུས་ནས་མི་གཡོ་བ་དང་བཀའ་གདམས་ཀྱི་ཆོས་གསན། དེ་ནས་དགུང་ལོ་བཅུ་དགུ་ལ་ཡུལ་དབུས་སུ་བྱོན་པས་ཉི་ཤུ་ལ་སྟོད་ལུངས་ཡུལ་ཐང་དུ་སླེབས། དགེ་བཤེས་རྒྱ་དམར་དང་། ཕྱ་པ་ལ་ཤར་གསུམ་དང་བྱམས་ཆོས་གསན། དེ་ནས་འཕན་ཡུལ་དུ་དགེ་བཤེས་པ་ཚབ་ལོ་ཙཱ་ལ་རིགས་ཚོགས་གསན། དེ་ནས་དགེ་བཤེས་ས་ཕུག་པ་ལ་བསྙེན་རྫོགས་མཛད་ནས་འདུལ་བ་གསན། དེ་ནས་སྟག་དུར་དུ་བྱོན་ནས་ལོ་ལྔ་བཀའ་གདམས་མཛད། ར་ལྕགས་སྟོན་ཚུལ་ལ་དགེས་རྡོར་གྱི་རྒྱུད་དང་། བདེ་མཆོག་དང་། མ་ཧཱ་མ་ཡ་དང་། ལམ་འབྲས་ལ་སོགས་པ་དང་། བྲག་དཀར་བ་ལ་རྫོགས་ཆེན་ཨ་རོའི་ལུགས་སྙན་རྒྱུད་གསན་ནོ། །དགུང་ལོ་སུམ་བཅུ་ལ་དགེ་བཤེས་ཤ་བ་གླིང་པའི་སྤྱན་སྔར་སློབ་དཔོན་བསྒོམ་ཚུལ་དང་མཇལ། དེ་ནས་བླ་མ་ལྷ་རྗེའི་སྤྱན་སྔར་བྱོན་པས་ཟླ་བ་གཉིས་ཙམ་དུ་མཇལ་དུ་མ་གནང་། མཇལ་དུས་སུ་དར་བཅུ་ཙམ་ཕུལ་ནས་གདམས་པ་
1-2-21b
ཞུས་པས་ལམ་རིམ་ཐོ་རེ་བ་གཅིག་གསུངས་ནས། ངས་ཀྱང་དེ་བསྒོམས་པ་ཡིན། ཁྱོད་རང་ཡང་དེ་བསྒོམས་གསུང་། ཞུ་སྣ་དང་བདག་འཛིན་ཐམས་ཅད་སློབ་དཔོན་བསྒོམས་པས་བྱས། དེ་ནས་ཆོས་རྗེ་ལ་དབང་བསྐུར་ཞུས། ཐབས་ལམ་གྱི་གདམས་ངག་གནང་ནས་བསྒོམས་པས། ཞག་དགུ་ན་དྲོད་ཆེ་བར་བྱུང་ནས་གོས་རྐྱང་པ་བྱས་ནས་ཟླ་བ་དགུ་བསྒོམས། བླ་མའི་ཞལ་ནས། ཁྱོད་ཟངས་རིར་བསྒོམ་དུ་སོང་གསུང་ནས་དབྱར་ཟླ་གསུམ་ཟང་རིར་བཞུགས་པས་སེམས་ཀྱི་གནས་པ་ཅི་བྱར་ཉན་པ་དང་། ལྷག་མཐོང་སྤྲིན་བར་གྱི་ཉི་མ་ལྟ་བུ་བྱུང་པ་དང་། བླ་མ་ལ་ཕྱག་བསྐྱེལ་དུ་བྱོན་ནས། སྒམ་པོར་ལོ་གསུམ། དཀའ་ཐུབ་དྲག་པོ་མཛད་ནས་བསྒོམས་པས་གྲྭ་པ་བརྒྱད་བརྒྱའི་ནང་ནས་བསྒོམ་སྲན་ཆེ་བར་གྲགས། ཡང་བླ་མའི་ཞལ་ནས། ཁྱོད་འོལ་ཀར་བསྒོམ་དུ་སོང་གསུང་ནས། དེར་འོལ་ཀར་བྲིའུ་རི་བོ་ཆེར་བྲག་ཕུག་གཅིག་ཏུ་བྱོན་ཙམ་ན། བུད་མེད་གཅིག་འབྱུང་ནས་ཁྱོད་འདིར་མ་འདུག །ངའི་མ་ཇོ་འོང་ཟེར། དེ་བྲག་སྲིན་མོ་ཡིན་པར་དགོངས་ནས་བྱམས་སྙིང་རྗེ་བསྒོམས། དེར་ཟླ་བ་བཅུ་བཞི་བསྒྲུབས་པས་ངེས་ཤེས་ཁྱད་པར་ཅན་ཐུགས་ལ་འཁྲུངས་ནས་ལམ་རྟགས་ངོ་མཚར་ཅན་མང་པོ་བྱུང་། ཤིན་ཏུ་དགའ་ནས་ཕྱག་བསྐྱེལ་བ་དང་དྲི་རྟོག་མཛད་དུ་འོངས་ཏེ། བྱ་ལྐོག་དགོན་པར་བླ་མ་ལ་ཞུས་པས། ཁམས་པ་སེ་བོ་ལ་ང་
1-2-22a
༄༅། །རེ་ཆེ་བ་ཡིན་པ་ལ་ཁྱོད་ཀྱིས་ནོར་ནས་འདུག་པས་ད་ལྟ་བསྒོམས་གསུང་། ནོར་ས་མི་འདུག་པ་ལ་དགོངས་ནས་ཟླ་བ་དྲུག་སྒམ་པོར་བསྒོམས་པ་ལ་བསྐྱེད་མ་བྱུང་། ཡང་བླ་མ་ལ། ལོ་བརྒྱར་བསྒོམས་ཀྱང་ངོ་བོ་ལ་བསྐྱེད་འོང་རྒྱུ་ནི་མི་འདུག །ནོར་ཡང་ང་རང་གི་བསྒོམ་ཡིན་ཞུས་པས། བླ་མ་དགྱེས་ནས། བུ་འཁོར་བར་འབྲེལ་ཆོད་པ་ཡིན་གསུང་ནས་གནས་ལུགས་དོན་གྱི་ངོ་སྤྲོད་རྗེས་སུ་བསྟན་པའི་གདམས་ངག་གསུངས། ཡང་རྗེ་བཙུན་གྱིས། ཁྱོད་རྩང་ཕྱོགས་སུ་ལྡོམ་བུ་ལ་སོང་གསུང་ནས་ལ་སྟོད་མན་ཆད་དུ་ལྡོམ་བུ་ལ་ཕྱིན། བླ་མ་མིད་ལའི་སློབ་མ་དགེ་ཚུལ་སྤུན་གཉིས་ལ་ཕྱག་རྒྱ་ཆེན་པོ་རྡེའུ་སྐོར་ཞུས༑ སྤེན་ཕུག་པ་ལ་བདེ་མཆོག་གི་དབང་བསྐུར་དང་། ཇོ་བོ་རྗེའི་གདམས་ངག་མང་དུ་ཞུས། རྒྱབ་མོ་སྤང་ཁ་བ་ལ། བརྟག་གཉིས་ཀྱི་གདམས་བཤད་ཞུས། དེ་ནས་མར་འོངས་ནས་འཕན་ཡུལ་བྱ་བཟངས་བྲག་ལ་དབྱར་དགུན་གསུམ་འདག་ཆར་བྱས་ནས་བསྒྲུབ་པ་བྱས། གཏུམ་མོའི་ཡོན་ཏན་དཔག་ཏུ་མེད་པ་བྱུང་པས་བློ་བདེའི་མགུར་བཞེངས་མཚན་བླ་མ་བྲག་པར་གྲགས། གཞན་སྣང་ལ་རི་བྲག་ལ་མི་ཐོགས་པར་འདུག་ཟེར་བ་ཡང་བྱུང་། དེ་ནས་རྗེ་བཙུན་ལ་ཕྱག་འཚལ་དུ་འོངས་ནས་སྒམ་པོར་ཟླ་བ་དགུ་བཞུགས། ཡང་རྗེ་བཙུན་གྱིས། ཁྱོད་མོན་དུ་བསྒོམ་དུ་སོང་གསུང་ནས་ཚ་བྲེ་ལྔ་ཁྱེར་ནས་མོན་གྱི་རྒྱལ་པོ་ག་
1-2-22b
ཏུང་གི་རྩར་བྱོན། དེའི་བཙུན་མོ་བོད་མོ་གཅིག་གིས་ཕ་མིང་དང་ལོ་ཙཱ་བྱས་ཏེ། རྒྱལ་པོ་ལ་ཞལ་མཐོང་བྱས། བླ་མས་རྒྱལ་པོའི་མཆོད་གནས་མཛད་ནས་མོན་གྱི་རི་ལ་བཞུགས། རྒྱགས་ཟད་ནས་ལེན་པའི་ལམ་ཁར་ནགས་གསེབ་ནས་སྟག་གཅིག་བྱུང་པ་དང་། བླ་མ་ཕ་འོང་གཅིག་གི་སྟེང་དུ་བཞུགས་པས་དེར་བསྐོར་བ་བྱས། འཚེ་བ་མི་བྱེད་པར་དགོངས་ནས་མར་བྱོན་པའི་ལམ་དུ་བུད་མེད་གཉིས་ཀྱིས་དཀུ་བ་ཕྱེད་བྲགས་གཅིག་ཆང་གིས་བཀང་ནས་དྲངས། རྒྱལ་པོའི་ཕོ་བྲང་དུ་བྱོན་པས་རྒྱགས་བསླངས་ནས་ཡར་ལམ་ལ་མི་གཉིས་ཀྱིས་སྟག་བྱུང་སར་བསྐྱལ། ཡང་རི་ལ་བཞུགས་པའི་ཚེ། མོན་བོད་མཚམས་དཔེར་བྱས་པའི་མགུར་བཞེངས། ཕྱིས་རྒྱལ་པོས་རས་ཀྱི་དོག་པ་འགའ་དང་དུག་སྔགས་གཅིག་རྫོང་བ་བྱས་ཏེ་ཚུར་བྱོན། ལམ་དུ་བླ་མ་རས་ཆུང་པའི་དྲུང་དུ་ཞག་བཞི་བཅུ་བསྡད་ནས་ཐུན་འཇོག་དང་ཆོས་དྲུག་ཞུས། ན་རོ་པའི་གདམས་ངག་ལེགས་པར་དྲི་རྟོག་བྱས་གསུང་། དེ་ནས་དྭགས་པོར་བྱོན་ནས་བླ་མ་དང་མཇལ་དུས་སུ། རྗེ་བཙུན་གྱི་ཞལ་ནས། ཁྱོད་ལ་སྟག་གིས་བསྐོར་བ་བྱས་ཨང་གསུང་། དེ་ལྟར་བྱས་ཞུས་པས༑ སྟག་དེ་ཡང་མཁའ་འགྲོ་མའི་སྤྲུལ་པ་ཡིན། བུད་མེད་གཉིས་ཀྱིས་བདུད་རྩི་དྲངས་པ་ཡང་ཞིང་སྐྱོང་གི་མཁའ་འགྲོ་མས་དངོས་གྲུབ་སྟེར་བ་ཡིན་གསུང་། དེར་ལོ་གཅིག་བཞུགས། ཡང་རྗེ་བཙུན་གྱི་ཞལ་
1-2-23a
༄༅། །ནས། ཁྱོད་གངས་དཀར་ལ་སོང་གསུང་ནས། དེར་བྱོན་ནས་སློབ་དཔོན་པད་མའི་དགོན་པ་ཕ་འོང་དཀར་ལེབ་ཀྱི་ཞབས་སུ་དབྱར་བཅུད་ལེན་མཛད་ཅིང་བཞུགས་པས་ཀྱང་། མཁའ་འགྲོ་མས་འཚོ་བ་དྲངས། ཡོན་ཏན་རིན་པོ་ཆེ་དུ་མ་རྒྱུད་ལ་སྐྱེས། བླ་མ་ལ་སངས་རྒྱས་ཀྱི་འདུ་ཤེས་བྱུང་ནས། ང་རང་ངན་གྱི་མགུར་བཞེངས། ལར་མོས་གུས་མེད་ན་རྒྱུད་ལ་ཡོན་ཏན་མི་འབྱུང་། ངས་བླ་མ་ལ་ཐ་མལ་གྱི་འདུ་གཤེས་འབྱུང་མ་མྱོང་གསུང་། སྟོན་ཀ་སྙེ་མོ་ཉི་དྲུངས་ཀྱི་འཕྲང་ན་མར་འོངས་ཙམ་ན། རྫོང་ཁ་ཅིག་ན་ཁང་པའི་རྩར་བུད་མེད་བཞི་ཐགས་འཐག་ཅིང་སྣང་། གཅིག་གིས་ཇོ་བོ་དྲོ་གསོལ་ལམ་ཟེར་བ་ལ་རུང་བྱས། གཅིག་ནང་དུ་སོང་ནས་ཡར་བྱོན་ཟེར། ཕྱིར་ཁྱེར་ལ་ཤོག་བྱས་པས། ཅང་མི་ཉེས་ནང་དུ་བྱོན་ཟེར། ཕྱིན་ཙམ་ན་བུད་མེད་བཞི་ནང་ན་སྣང་། དཀུ་བ་ཕྱེད་པ་ཐོད་པ་འདྲ་བ་གཅིག་གི་ནང་དུ་བཟའ་བཏུང་དྲངས་པ་ལ། ཕྱག་ཚང་བུད་མེད་དེའི་མཐེ་བོང་གཉིས་ལ་བདེ་མཆོག་ཞལ་བཞི་པ་ཕྱག་བཅུ་གཉིས་ཡུམ་དང་བཅས་པ་གཅིག་གཟིགས། བཟའ་བཏུང་དེ་མིའི་སོར་མཛུབ་ཀྱི་ཚོད་མར་འདུག །ཐེ་ཚོམ་མེད་པར་གསོལ་བ་ལ་རོ་མཆོག་བརྒྱ་དང་ལྡན་པ་བྱུང་། ཡང་བུད་མེད་དེས་ཕོར་པ་ནམ་མཁའ་ལ་བཟེད་ཙམ་ན་འོ་མ་འདྲ་བས་གང་བ་དྲངས་པ་གསོལ། སྒོར་བྱོན་ཙམ་ན་བུད་མེད་བཞི་སྒོ་ན་ཐགས་འཐག་
1-2-23b
ཅིང་སྣང་། དེར་མར་བྱོན་པའི་ལམ་དུ་ས་གཞི་དར་གྱི་འབོལ་སྟན་ལྟར་འཇམ་པ་དང་། སྐུ་རས་བལ་ལྟར་ཡང་བ་དང་། ཡིད་ངོས་བཟུང་མེད་པར་དགའ་བ་བྱུང་། བླ་མས་ཕྱིས། དེ་བཞི་བདེ་མཆོག་གི་མཁའ་འགྲོ་མ་ཡིན་གསུང་། དེ་ནས་གཞུ་སྙེ་གཉིས་ཀྱི་བར་ན་རྫོགས་ཞེས་པའི་དགོན་པ་ན། བསྒོམ་མ་གཅིག་ཕྱུགས་འཚོ་བ་དང་འཕྲད། ཡ་ཀིའི་དགོན་པ་ན་སུ་བཞུགས་དྲིས་པས། ངའི་སློབ་དཔོན་བཞུགས་ཟེར། འོ་ན་མཇལ་བར་ཞུ་བྱས་པས། མཚམས་བྱས་ཡོད་ཟེར། ཅིས་ཀྱང་མཇལ་བར་ཞུ་བྱས་པས། ངས་བླ་མ་ལ་ཞུ་ཡི་ཟེར་ནས་སོང་། ཡར་བྱོན་ཟེར། ནང་དུ་ཕྱིན་པ་ལ། བཙུན་རྒན་ཕོ་མོ་གཉིས་སྣང་། ཕྱག་བྱས་པ་ལ་མ་བྱེད། བཙུན་མ་ཡོད་ཀྱི་བརྡ་བྱེད་ཀྱང་ཕྱག་ལེགས་པར་འཚལ། དེ་ནས་ཇ་གྲལ་དུ། བླ་མའི་ཞལ་ནས། ཁྱོད་ལ་དེ་རིང་བུད་མེད་བཞིས་ཆོས་སྟོན་དྲངས་ཨང་གསུང་། དྲངས་བྱས་པས། དེ་ཀུན་མཁའ་འགྲོ་མ་ཡིན། ཚོད་མའི་རྒྱུ་དེ་བལ་ཡུལ་ཕམ་མཐིང་ན་ཁྱིམ་བདག་ཨ་ཤོ་ཀའི་བུ་དྷརྨ་སིདྷི་ཤི་ནས་རོ་ཏརྟི་ཏའི་དུར་ཁྲོད་དུ་བསྐྱལ་བ་མཁའ་འགྲོ་མས་བླངས་པ་ཡིན་གསུང་། ད་ལྟ་དེ་ན་ཡོད་དམ་དྲིས་པས། དེར་མེད། ཁ་ཆེའི་གྲོང་ཁྱེར་སམྦྷ་ཏའི་དུར་ཁྲོད་ན་ཟླ་བ་ནག་པོའི་ཉི་ཤུ་ལྔ་ལ་མཁའ་འགྲོ་མ་འདུ་བའི་དུས་ཡིན་པས་ཚོགས་མཆོད་ལ་དེར་སོང་ཟིན། མཁའ་འགྲོ་མས་ཁྱེད་ལ་དངོས་གྲུབ་སྟེར་བ་ཡིན། མོན་
1-2-24a
༄༅། །གྱི་ལམ་དུ་བུད་མེད་གཉིས་ཀྱིས་བཏུང་བ་དྲངས་པ་དེ་ཡང་མཁའ་འགྲོ་མ་ཡིན་གསུང་། རིན་པོ་ཆེའི་ཐུགས་ལ། ཁོང་གི་དགོན་པ་དེ་བླ་མའི་འཕར་ཚང་དགོན་པ་འདྲ་སྙམ་ཚེ། བླ་མ་རྫོགས་པས། ཁྱོད་ཀྱི་བླ་མའི་འཕར་ཚང་དགོན་པ་དེ་ངའི་འདི་འདྲའམ་གསུང་། བླ་མས་བསམ་མནོ་བྱེད་མ་སྤོབས་ཏེ། དེ་ལ་སོགས་པ་མང་དུ་གསུངས། ཁྱོད་ཀྱིས་བླ་མ་ལྷ་རྗེ་ཅི་གསུང་གིས་གསུང་། ཁོང་ལ་ཕྱག་རྒྱ་ཆེན་པོ་ཐོག་བབས་དང་གདམས་ངག་མང་དུ་ཞུས་གསུང་། དེ་ནས་སྒམ་པོར་ཕྱག་བསྐྱེལ་དུ་བྱོན་ཙམ་ན། གྲོལ་སྒོམ་དང་ཁམས་པ་སེ་བོ་གཉིས་སྡོད་གསུང་ནས། དེ་ནུབ་ཉམས་དགའ་བའི་བླ་བོ་མང་པོ་གསུངས། རྗེ་བཙུན་གྱི་ཞལ་ནས། ཁྱོད་ལ་དེ་འདྲ་བ་མཁྱེན་པའི་བླ་མ་ཡོད་དམ་གསུང་། ཡོད་ཞུས་པས། བླ་མ་ནཱ་རོ་པའི་གསུམ་སློབ་ཡིན་གསུང་། སྔར་མཁའ་འགྲོ་མས་འཚོ་བ་དྲངས་པ་ལ་སོགས་པ་རྣམས་ཇི་ལྟ་བ་བཞིན་བླ་མས་མཁྱེན་ནས་ཚུར་གསུང་། ཕར་ལ་ཞུ་མ་དགོས། རྗེ་བཙུན་གྱི་ཞལ་ནས། ངའི་བླ་མ་མིད་ལ་དེ་ཟད་པར་མེའི་ཏིང་ངེ་འཛིན་ལ་བཞུགས་པའི་དུས་སུ། ངས་མེའི་སྣ་མ་བརྟེན་ནས་བྲོས། ཆུའི་ཏིང་ངེ་འཛིན་ལ་བཞུགས་པའི་དུས་སུ། ངས་ཆུ་ལྡེང་གཅིག་ཏུ་མཐོང་། ཟད་པར་གྱི་ཡོན་ཏན་དང་མངོན་པར་ཤེས་པ་རྒྱ་ཆེན་པོ་མངའ་ཡང་ཁོང་ལ་རློམ་པ་རྡུལ་ཙམ་ཡང་མེད། སྤྱིར་བསྒོམ་ཆེན་པ་ཡོན་ཏན་ལ་རློམ་པ་
1-2-24b
སྐྱེར་མི་རུང་ངོ་གསུང་ནས་གདམས་ངག་མ་ལུས་པར་གནང་། བླ་མའི་ཞལ་ནས། ང་སྐམ་པོ་གནས་ནང་དུ་འགྲོ་ལྡོག་བྱས་ཙམ་ན་ཞབས་བསྙུང་བས་འགྲོར་མ་བཏུབ་པ་ཡིན། ཁྱོད་སོང་དང་གཞན་ལ་ཕན་ཐོགས་པར་འདུག་གསུང་། ཟངས་ཟླུམ་དུ་སློབ་དཔོན་བསྒོམ་པ་ལ་ཕྱག་བསྐྱལ་བས་ཀྱང་དེ་རྣམས་མཁྱེན་ནས་ཚུར་གསུངས་སོ། །དེ་ནས་ཡར་བྱོན་ནས་གཞུ་སྨད་ཀྱི་ལྷ་རི་རྒྱན་པོ་ལ་དབྱར་ཟླ་བ་གསུམ་བཞུགས་དུས་སུ། ཨེ་མ་ཕུང་པོ་དུར་ཁྲོད་ཀྱི་མགུར་བཞེངས། དེའི་དགུན་ནས་གཞུ་གྲུ་བཞི་དགོན་པ་བཟུང་བ་ལ་བུད་མེད་གཅིག་གིས་འཚོ་བ་དྲངས། མཁའ་འགྲོ་མར་འདུག །འཚོ་བ་བྲང་བྲེང་ཙམ་ལས་མ་བྱུང་༑ ལར་ངས་བསྒྲུབ་པ་བྱས་པའི་དུས་ན་ལྟོ་གོས་འཛོམ་པོ་མ་བྱུང་ཡང་བསྒྲུབ་པ་ལ་ཐང་ལྷོད་ཤོར་མ་མྱོང་། ངའི་བཀའ་སླ་ཙམ་སུས་ཀྱང་མི་ནུས། ལྟོ་རྒྱབ་ལ་གྱོང་སྐུར་མི་ནུས་པར་དང་པོ་ནས་འཛོམ་པོ་འདོད་པ་ལ་ཆོས་མི་འོང་གསུང་། དེའི་ཚེ། བླ་མ་བཻ་རོ་ལ་དབང་དང་བྱིན་རླབས་ཞུས་ནས་བདེ་མཆོག་ལྷན་སྐྱེས་དང་། རྗེ་བཙུན་མ་ཨུ་རྒྱན་མ་དང་། ཏཻ་ལོའི་དོ་ཧ་དང་། ཕྱག་རྒྱ་ཆེན་པོའི་གཏུམ་མོ་ལྷན་སྐྱེས་བ་སོགས་པ་མང་དུ་ཞུས། བླ་མ་དཔལ་རྒ་ལོ་དང་། ཁམས་པ་ཨ་སེང་གཉིས་ལ་བདེ་མཆོག་གི་དབང་བསྐུར་ཞུས་ནས་གདམས་ངག་མང་དུ་གསན། སྤྱིར་དབུས་རྩང་དུ་ལོ་སུམ་བཅུ་བཞུགས་ཏེ། ལོ་བཅུར་
1-2-25a
༄༅། །ཐོས་བསམ་དང་། ལོ་བཅུ་གཉིས་བསྒྲུབ་པ་མཛད་པ་ལ་ལག་པ་རྔུལ་དང་བྲལ་མ་མྱོང་གསུང་། ལོ་བརྒྱད་དུ་གཞུར་བཞུགས། ཚོགས་པ་བཞི་བཅུ་ཙམ་བྱུང་། སྐལ་ལྡན་མང་རབ་ལ་ཕན་ཐོགས། ཡོ་བྱད་ཅི་བྱུང་འཕྲལ་དགོས་མ་གཏོགས་པ་བླ་མ་གཉིས་ལ་འབུལ་བ་བྱས་གསུང་། དེའི་ཚེ་སློབ་དཔོན་སྒོམ་པ་བ་ལྷ་ལུང་ན་གྲྭ་པ་གསུམ་བརྒྱ་ཙམ་དང་བཞུགས་པ་ལ། རྟ་ཁྲབ་འགའ་རེ་ཁྱེར་ནས་ཁམས་སུ་ལ་བཞུད་པའི་ཕྱི་ཕྱག་ལ་བྱོན་པས། སློབ་དཔོན་གྱི་ཞལ་ནས། ང་ཡང་ཐེངས་གཅིག་གནས་ནང་དུ་ཆས་པ་ཡིན་པ་ལ་རྐང་པ་ན་བས་མ་རྟོལ། བླ་མའི་བཀའ་ཡིན་པས་ལན་ཅིག་སོང་ལ་བཟའ་མི་རྙེད་པའམ། གཡེང་བ་ཆེས་ན་དགེ་སྦྱོར་མ་དམར་ན་ཡར་ལ་ཤོག་ང་འཆི་གསུང་བས། དེར་བཤུམས་པས། བླ་བོ་བཤད་ཀྱིས་ཉོན་དང་གསུང་ནས་སྔར་བསྒྲུབ་པ་མཛད་པ་དང་། ད་ལྟ་ཆོས་ཐམས་ཅད་སྒྱུ་མར་ཤེས་པ་དང་། རྡོ་རྗེ་གདན་སྐད་ཅིག་ལ་བལྟ་ནུས་པ་ལ་སོགས་པ་གསུངས། གྲུ་བཞིར། ཁམས་སུ་འགྲོའམ་སྙམ་ཚེ། སྐམ་པོའི་རྡོ་རྗེ་དཔལ་བརྩེགས་བསུར་བྱུང་པ་གཞུའི་ལྷས་བཀག་པས་མ་ཁེགས་གསུང་ངོ་། །དེ་ནས་ཞི་མགོ་བའི་ཚོང་དཔོན་རིན་དཔལ་གྱིས་གདན་འདྲེན་བྱས་ནས་འཕན་ཡུལ་དུ་བྱོན་ཙམ་ན། ཏྲེ་བོས་འགྲོར་མ་སྟེར། དེའི་དུས་སུ་བླ་མ་ཕག་མོ་གྲུ་པས། བཙུན་པ་ཡེ་ཤེས་འོད་ལ་ཕྲིན་བསྐུར་ནས། ཁྱེད་ཁམས་
1-2-25b
སུ་མ་བཞུད། དབང་བསྐུར་དང་རབ་གནས་མང་པོ་ཟེར་བ་དེ་ཙམ་མ་མཛད། སྐུ་ཚེ་ལ་བར་ཆད་འོང་དོགས་ཡོད་གསུང་། རིན་པོ་ཆེའི་ཞལ་ནས། ཁོང་ང་ལ་ཐུགས་བརྩེ་བ་ཡིན་ཏེ། ང་གཞོན་ལྔ་མེད་པར་འབྲོག་དུ་མི་འགྲོ། དེ་ཙམ་གྱི་ཡིད་ཚོད་མད་པར་རབ་གནས་དབང་བསྐུར་མི་བྱེད། ངས་བླ་མ་མིད་ལའི་སྐུ་ཚེ་ཙམ་ཐུབ་པ་ཡིན་གསུང་། དེར་ཚུར་ལོག་ནས། མཚུར་གྱི་ངོས་བཟང་དགོན་པར་བཞུགས། ཡང་ཀོལ་ཏི་བའི་མགྲོན་པོ་གོ་བཙུན་ཡོན་བདག་གིས་གདན་འདྲེན་བྱས་ནས་འཕན་ཡུལ་དུ་བྱོན་པ་ཡང་ཏྲེ་བོའི་མགྲོན་པོས་འགྲོར་མ་སྟེར། གཞུ་ན་ཚུར་ལོག་ནས། སློབ་དཔོན་བསྒོམ་པ་སྙིང་པོ་སེ་རུ་ན་བཞུགས་པ་ལ་རྟ་བཟང་པོ་དང་འབུལ་བ་འགའ་ཁྱེར་ནས་ཕྱག་ལ་བྱོན། དེ་ནས་ཏྲེ་བོས་གདན་འདྲེན་བྱས་ནས། དགུང་ལོ་ལྔ་བཅུ་ལ་ཁམས་སུ་བཞུད། ལ་སྟོད་ཀྱི་མཁར་སེར་དུ་ལོ་གཉིས་བཞུགས། སྐལ་ལྡན་འགའ་རེ་ལ་ཕན་ཐོགས། སློབ་དཔོན་བསྒོམ་པ་ལ་འབུལ་བ་ཡང་བསྐུར། ཏྲེར་བཞུད། ལོ་གཉིས་བཞུགས་སྐལ་ལྡན་འགའི་དོན་མཛད། ལོ་ལྔ་བཅུ་རྩ་ལྔ་ལ་སྐམ་པོ་གནས་ནང་དུ་བྱོན། འགྲོ་བ་མང་པོ་ལ་ཕན་ཐོགས༑ བསྒོམ་ཆེན་རྟོགས་ལྡན་མང་པོ་ཡང་བྱུང་པས། ལོ་ལྔ་ན་ཇ་མཛོ་ལྔ་བཅུ་ལ་སོགས་པ་གདན་སར་བསྐུར། དགུང་ལོ་དྲུག་བཅུ་རྩ་བདུན་ལ་བསྙུང་བ་ལ། ཉེ་གནས་ཀུན་གྱིས་གྲྭ་པ་ཐམས་ཅད་བསྡུས་
1-2-26a
༄༅། །ནས། བླ་མ་གཤེགས་དོགས་ཡོད་ཅི་བྱ་ཟེར་བ་ལ། དེ་དག་འདུན་གྲོས་བྱས་ནས་བླ་མ་སྟག་དེའུ་བ་དང་། གྲྭ་པ་རྒན་པོ་བཅུས། རིན་པོ་ཆེའི་བསྙུང་ནད་འདི་ལ་གྲྭ་པས་རིམ་གྲོ་ཅི་བྱས་ཀྱང་ཕན་པ་མ་བྱུང་པས། ད་བླ་མ་ཉིད་ཀྱིས་ཚོགས་བསོག་ཅིག་མཛད་པར་ཞུ་དགོས་ཞེས་ཞུས་པས། རིན་པོ་ཆེའི་ཞལ་ནས། ཁྱེད་ཀྱིས་ང་འཆི་བསམ་སྟེ། ད་ལྟ་མི་འཆི། བླ་མ་མིད་ལའི་སྐུ་ཚེ་ཙམ་ཅིག་ཐུབ། དེ་ལ་གློ་བུར་བ་མི་འོང་། ཚོགས་གསོག་བྱས་པས་ཆོག་གསུང་ནས། གདན་སར་གཡུ་བདུན་ལ་སོགས་པའི་ཚོགས་གསོག་བྱས་པས་སྐུ་ཁམས་ཡང་བདེ་བར་འགྱུར་ཏོ། །དེ་ནས་དབུས་སུ་བཞུད་པར་དགོངས་པས་རྡོ་རྗེ་དཔལ་བརྩེགས་ཀྱིས་སྨན་བསྟན་ཞུ་བ་ཕུལ། དགེ་འདུན་ཀུན་ཞུ་བ་དྲག་པས་ལོ་མང་དུ་འགོར། ཀ་བྲག་གི་དགེ་བཤེས་ཚུལ་ཁྲིམས་མཆོག་གིས་བཙུན་པ་གཅིག་ལ་ཕྲིན་ཡིག་གཉིས་བསྐུར་བ་ཁོང་གིས་ཕྲིན་ཡིག་ལ་བླ་མ་ཐངས་གཅིག་ཏྲེར་བྱོན་ང་དང་ནི་མཇལ་དེ་མི་འོང་ཅིས་ཀྱང་བྱོན་པར་ཞུ་ཟེར་བ་དང་། ཨ་ཙ་ར་གཅིག་རྒྱ་གར་ནས་མར་སོང་ཏོང་ཀུན་ནས་ས་སྐྱར་ཡར་འོངས་པས་རྒྱ་ཡིག་གཅིག་འོངས་འདི་བླ་མ་དེ་ལ་གཏོད་ཟེར་བ་དང་གཉིས་བཟུང་ནས་བྱུང་། རྒྱ་ཡིག་འདིའི་དོན་ངས་ཤེས་གསུང་། དེ་ནས་བཞུད་ཚིས་མཛད་པ་ལ་དགེ་འདུན་ཀུན་གྱིས་ཇི་ལྟར་ཤོལ་བཏབ་ཀྱང་མ་གསན་ནས། དགུང་ལོ་བདུན་བཅུ་
1-2-26b
རྩ་དགུ་ལ་འབྲི་ཀླུང་དུ་ཡར་བྱོན། སྦས་ཡུལ་དུ་དགེ་བཤེས་ཀྱང་སྐྱ་བ་ལ་སོགས་པ་འགྲོ་བ་མང་པོ་ཕན་བདེ་ལ་བཀོད། ལྷོང་ཁྲར་དབྱར་བཞུགས། འབྲི་དམ་པ་ཆོས་ཕྱུག་གི་དགེ་འདུན་ཐམས་ཅད་དེར་བྱོན་སྨིན་གྲོལ་གྱི་ལམ་ལ་བཀོད་ཡང་དྲེར་བྱོན་པ་རང་གིས་འཁྲུག་པ་ཐམས་ཅད་ངོ་བོ་ཉིད་ཀྱིས་ཞི་ནས། ཡུལ་མི་ཐམས་ཅད་བདེ་བར་གྱུར་ཏོ། །དགེ་བཤེས་ཚུལ་ཁྲིམས་མཆོག་འདས་ཟིན་ལོ་གཉིས་བཞུགས། འགྲོ་བ་མང་པོ་ལ་ཕན་ཐོགས། གདན་སར་གཡུ་ཆེན་བདུན། ཇ་སུམ་བཅུའི་འབུལ་བ་བསྐུར། དེ་ནས་འབྲི་ཀླུང་ལྕེ་བར་དུ་བཞུགས། གདུལ་བྱ་ཐམས་ཅད་འཚོགས་པས་རབ་ཏུ་བྱུང་པ་སྟོང་རེ་ཙམ་བྱུང་བ་སྨིན་གྲོལ་གྱི་ལམ་ལ་བཀོད། ཟླ་སྨད་དུ་བྱོན་ནས་ཀླེའུ་རུ་ཀར་མར་དགོན་པ་མཛད། གདུལ་བྱ་ཐམས་ཅད་སྨིན་པར་མཛད། མི་མཐུན་པ་རྣམས་བསྡུམས། བཙོན་ཐམས་ཅད་བཀྲོལ། གསེར་འབུམ་གཅིག་དང་གཡུ་དངུལ་འགའ་གདན་སར་བསྐུར། དེ་ནས་འགྲོ་དོན་མཛད་ཅིང་ལྷོ་བརྒྱུད་དུ་ཤུལ་ཕྱུང་ནས་དབུས་སུ་བྱོན་ནས། གདན་སར་གསེར་འབུམ་ཚར་བཞི། མདོ་མངས་ཚར་གཅིག །སྤྱིར་གསེར་གྱི་གླེགས་བམ་བརྒྱ་དང་བཅུ། གཡུ་ཆེན་བཅུ། མཛོ་རྟ་ལྔ་བཅུ་ལ་སོགས་པའི་འབུལ་བ་བྱས། ཇོ་བོ་ཡི་གེ་དྲུག་པ་དང་། ཇོ་ཤཱཀྱ་རྣམ་གཉིས་ཀྱིས་དབུ་མཛད་པའི་དབུས་རྩང་གི་སྡེ་དགོན་རྣམས་ལ་རྟ་བདུན་བཅུ། སྤྱིར་
1-2-27a
༄༅། །སྣངས་ཆེན་བརྒྱ་ལྷག་གི་ཚོགས་གསོག་མཛད། དེ་ནས་སྟོད་ལུང་མཚུར་ཕུར་གདན་ཕབ། འཚལ་པ་དང་དག་ར་བའི་འཁྲུག་པ་ཐམས་ཅད་བསྡུམས། ཡུལ་མི་རྣམས་བདེ་བར་བྱས། བོད་ཡུལ་གྱི་གདུལ་བྱ་མ་ལུས་པ་དེར་འཚོགས། སྨིན་པ་དང་གྲོལ་བར་མཛད་དོ། །དཀའ་སྤྱད་དང་གཞན་དོན་གྱི་ལོ་གྲངས་ཏེ་ལེའུ་བཅུ་གཅིག་པའོ།། །།
༄། །ལེའུ་བཅུ་གཉིས་པ། དག་སྣང་གི་ལེའུ།
རིན་པོ་ཆེས། ཐོག་མར་སྒམ་པོར་བྱོན་པ་ལ། ཤྭ་བ་གླིང་པའི་སྤྱན་སྔར་སློབ་དཔོན་བསྒོམ་པ་དང་མཇལ་དུས་སུ་སྒྲོལ་མ་དཀར་མོ་གཅིག་ཏུ་གཟིགས། དེ་བླ་མ་གོང་མས་མཁྱེན་ནས་ཚུལ་སྙིང་བསྐྱེད་རིམ་ལ་བརྟན་པ་ཡིན་གསུང་། དེ་ནས་ཆོས་རྗེ་ལ་དབང་བསྐུར་ཞུས་དུས་ན། དགྱེས་མཛད་རྡོ་རྗེའི་སྐུ་འོད་ཀྱིས་ར་བར་བཞུགས་པ་གཅིག་དུ་གཟིགས་གསུང་། ཡང་གྲོགས་མཆེད་བཞི་ཡིས། སློབ་དཔོན་བསྒོམ་པ་ལ་དབུ་མར་ཞུས་དུས་སུ། སློབ་དཔོན་ལ་གྲོགས་མཆེད་མཐོང་སྣང་འཐུན་པར་ཧེ་རུ་ཀར་གཟིགས་ནས། བླ་མ་ལ་ཞུས་པས། ཧེ་རུ་ཀ་ནི་ང་ཉིད་ཡིན་གསུང་། སློབ་དཔོན་བསྒོམ་པ་ལ་གཟིགས་པ་དྲུག །དགྱེས་པ་རྡོ་རྗེར་གཟིགས་པ་གསུམ། རྡོ་རྗེ་རྣལ་འབྱོར་མ་དང་འོད་ཕུང་གཅིག་ཏུ་གཟིགས། འོད་དུ་མཐོང་ཚེ་ཞུས་པས། ངས་ཟད་པར་ཆུར་བསྒོམས་པ་ཡིན་ཏེ་ཟད་པར་གཞན་ཀུན་ཀྱང་ནུས་གསུང་། གྲུ་བཞི་ན་བཞུགས་པའི་དུས་ན་ཆོས་རྗེ་སྐུ་ཡལ་བ་ཐོས་ནས་བཞུད་པས། 
1-2-27b
ཕོ་རོག་རྫོང་ཆུང་དགོན་པར། སློབ་དཔོན་བསྒོམ་པ་དང་། སློབ་དཔོན་འཕགས་པ་གཉིས་དང་མཇལ་བས། སློབ་དཔོན་བསྒོམ་པའི་ན་བཟའ་ནས་འཇུས་ནས་སྤྱན་ཆབ་ཕྱུང་པ་ལ། རྗེ་བཙུན་གོང་མས་ཁོང་གི་གདུང་བ་བསལ་བའི་ཕྱིར་འཇའ་ཚོན་གྱི་རྣམ་པར་ནམ་མཁའ་ལ་གཟུགས་སྐུར་ཝལ་གྱིས་བྱོན་པ་དཔོན་སློབ་གསུམ་མཐོང་སྣང་མཐུན་ནས་ཕྱག་བཙལ་བ་དང་། དེ་ཉིད་དུ་ཡལ་གསུང་། གནས་ནང་ན་བཞུགས་དུས་ན་བདེ་ཆུང་སངས་རྒྱས་ལྷོ་སྟོད་དུ་ལྡོམ་བུ་ལ་སོང་པས། དྭགས་ལྷ་སྒམ་པོར་བླ་མའི་གདན་ས་ཞིག་པ་ཐོས་ནས་བྱུང་པ་ལ། རིན་པོ་ཆེས་དགོངས་པ་ལ་གཟིགས་པས་དང་པོ་དྭགས་པོ་གསལ་བར་བྱུང་། དེ་ནས་བལ་ཡུལ་གསལ་བ། དེ་ནས་སྟེང་དང་ཕྱོགས་མཚམས་ཐམས་ཅད་གསལ་པས་སངས་རྒྱས་ཀྱི་ཞིང་ཁམས་མང་པོ་གཟིགས། གདན་ས་ཞིག་པ་མི་བདེན་པར་འདུག་གསུང་། དེ་ཇི་ཙུག་ལགས་ཞུས་པས། ངས་ད་ལྟ་རང་ལྟས་པས་མཐོང་གསུང་ནས་གོང་གི་དེ་ལྟར་གསུངས་སོ། །གནས་ནང་དུ་ཁྱི་ལོའི་འདས་མཆོད་ཀྱི་རྟིང་ལ་ནམ་མཁའ་ལ་ཤཱཀྱ་ཐུབ་པ་ལ་སོགས་པ་དཀྱིལ་འཁོར་གྱི་ལྷ་ཚོགས་དཔག་ཏུ་མེད་པའི་ཞལ་གཟིགས། ཁྱད་པར་དུ་རྗེ་བཙུན་རྣལ་འབྱོར་མ་དབུ་སྟོང་སྤྱན་སྟོང་མ་དཔའ་མོ་སུམ་བཅུ་སོ་དྲུག་གིས་བསྐོར་བའི་ཞལ་ནས། འདི་ན་ཧེ་རུ་ཀ་དཔལ་རྒྱུ། །སེམས་ནི་དྲི་མ་མེད་པར་
1-2-28a
༄༅། །འདོད། །དག་པ་ཆོས་ཀྱི་སྤྲུལ་པ་ནི། །ཕག་མོའི་གཟུགས་སུ་བྱུང་པ་ཡིན། །ཞེས་གསུངས་སོ། །གནས་ནང་དུ་སྟོན་ཟླ་ར་བའི་ཉ་ལ་བླ་མའི་འདས་མཆོད་བྱེད་དུས་སུ། ཉི་མ་ཕྱེད་ཡོལ་བ་ན། ནམ་མཁའ་ལ་འཇའ་ཚོན་གདུགས་དང་དཀྱིལ་འཁོར་འདྲ་བ་ཡང་མང་པོ་བྱུང་པའི་ནང་དུ་བླ་མ་ལྷ་རྗེ་དང་། ཉེ་གནས་ལེགས་མཛེས་གྲགས་མཛེས་དང་གཙོ་འཁོར་དུ་བཞུགས་ནས། བླ་མའི་ཞལ་ནས། བུ་གཉིས་སུ་མེད་པ་ལྟ་བའི་དོན། །ཡེངས་པ་མེད་པ་བསྒོམ་པའི་དོན། །ཟུང་དུ་འཇུག་པ་སྤྱོད་པའི་དོན། །དེ་གསུམ་དབྱེར་མེད་འབྲས་བུའི་དོན། །ཅེས་གསུངས་པས་ཡང་བླ་མ་རང་གི་སྐུ་འབག་གཅག་དང་། དགྱེས་རྡོར་གྱི་སྐུ་དཀྱིལ་འཁོར་གཅིག་དང་རབ་གནས་ཞུས་པ་ལ། རྟེན་འབྲེལ་བཟླས་པའི་སྐབས་སུ། སྒྲོལ་མ་ལ་བསྟོད་པ་གྱིས་གསུང་། ཕྱིས་ཇི་ལྟར་ལགས་ཞུས་པས། སྒྲོལ་མ་ལྷ་དགུ་མ་གཉིས་བྱོན་ནས་ཐང་ཀ་ལ་ཐིམ་གསུང་། ཡང་ཡོན་བདག་སྐྱ་དགོན་པ་ལྷ་ཁང་གི་རབ་གནས་ཞུས་པ་ལ་བཞུད་པའི་ལམ་དུ་དཔལ་ལྡན་མ་ཞལ་གཟིགས། རབ་གནས་མཛད་དུས་སུ་ནམ་མཁའ་ལ་ཌཱ་མ་རུ་དང་། ཨཱ་ལྀ་ཀཱ་ལྀའི་སྒྲ་གསན་ནས་ཡར་བལྟས་པས་ནམ་མཁའ་ལ་ལྷ་ཚོགས་དཔག་ཏུ་མེད་པ་ཞལ་གཟིགས་ཏེ་སྒྲ་གསན་པ་ནི། ལྟ་སྒོམ་ནམ་མཁའ་ཆུ་དང་མཚུངས། །སྤྱོད་པ་འགག་མེད་བསྒྲུབ་ཏུ་མེད། །དེ་གསུམ་དབྱེར་མེད་
1-2-28b
གཉུག་མ་ཡིན། །ཀུན་རྫོབ་པི་ཝང་སྒྲ་དང་མཚུངས། །དེ་དོན་དེ་ཉིད་དབྱེར་མེད་ཡིན། །ཞེས་གསུངས་སོ། །ཡུལ་དེར་དགྱེས་རྡོར་གྱི་རྐང་བརྒྱད་བསྟོད་པ་གཅིག་དང་། བར་དོའི་གདམས་པ་གསན་གསུང་། ཡང་གནས་ནང་ན་གངས་རི་ཆེན་པོ་གཅིག་སྟེང་ན་སྤྲིན་ནག་པོ་གཅིག་བྱུང་པའི་ནང་ན་གྲི་གུག་དཔག་ཏུ་མེད་པ་འཚུབ་པའི་ནང་དུ་ཆོས་སྐྱོང་མགོན་པོ་ཞལ་གཟིགས་གསུང་། སྤྱིར་ལྷ་ཚོགས་ཇི་ཙམ་ཞལ་གཟིགས་ཞུས་པ་ལ། འདི་ཙམ་གྱི་གྲངས་མེད་དེ། འོན་ཀྱང་། སངས་རྒྱས་སུམ་བཅུ་རྩ་ལྔ། འོད་ཟེར་ཅན། ཁྲོས་མ་ནག་མོ། དགྱེས་རྡོར་གྱི་དཀྱིལ་འཁོར། བདེ་མཆོག་གི་དཀྱིལ་འཁོར། གསང་འདུས་ཀྱི་དཀྱིལ་འཁོར། དགྲ་ནག་གི་ལྷ་ཚོགས། འཇིགས་བྱེད་ཀྱི་ལྷ་ཚོགས། ཚོགས་འཁོར་གཅིག་གི་དུས་སུ་སྒྱུ་མ་ཆེན་མོ་ལྷ་ལྔ། རྗེ་བཙུན་མ་ལྷ་ལྔ། འདིར་རྗེ་བཙུན་མ་དཀར་མོ་དང་། གནས་ནང་དུ་མི་གཡོ་བ་དང་༑ བདག་མེད་མ་ཞལ་སྦྱོར་དང་། མི་གཡོ་བ་ལ་སྒྲོལ་མ་སྔོན་མོས་ཡུམ་བྱས་པ། དགྱེས་རྡོར་ལྷན་སྐྱེས། གྲུ་བཞིར། བདེ་མཆོག་ལྷན་སྐྱེས་ས་ཕུག་ཏུ་བདུད་རྩི་འཁྱིལ་པ་ལྷ་དགུའི་དཀྱིལ་འཁོར་ལ་བདག་མེད་མས་ཡུམ་བྱས་པ་ཞལ་གཟིགས། ཡང་ལྷོ་ཕྱོགས་དཔལ་གྱི་རི་ལ་རྡོ་རྗེ་རྣལ་འབྱོར་མ་གཅེར་བུར་འདུག་པ། སྐྲ་གྲོལ་བ། བདེ་བའི་ཉམས་དང་ལྡན་པ། ཐོད་པ་དང་གྲི་གུག་བསྣམས་པ། ཕྱག་གཡོན་པའི་
1-2-29a
༄༅། །གྲུ་མོའི་ནང་དུ་ཞབས་གཡས་པ་བཅུག་པ་རྒྱན་མེད་པ་གཅིག་གཟིགས་གསུང་། ཡང་ནམ་མཁའ་ལ་ཨཱ་ལི་ཀཱ་ལི་མང་པོ་བྱུང་། དེའི་རྗེས་ལ་བདག་མེད་མ་ལྷ་མོ་བཅོ་ལྔའི་ཞལ་གཟིགས། ཡང་ནམ་མཁའ་ལ་རིན་པོ་ཆེ་སིངྒ་གླིང་གི་དུར་ཁྲོད་དུ་བྱོན་པས། སློབ་དཔོན་རྡོ་རྗེ་དྲིལ་བུ་པ་དང་མཇལ་བས་གསོལ་བ་ཐེབས་གསུང་། ཡང་འདས་མཆོད་ཀྱི་རྟིང་ལ་རྡོ་རྗེ་གདན་གྱི་བྱང་ཕྱོགས་ན་མ་ཧེ་རྒྱུ་བའི་འཚལ་ན་སློབ་དཔོན་སྒོམ་པ་དང་མཇལ། སློབ་དཔོན་གྱི་ཞལ་ནས། ཁྱོད་འདིར་འོང་བའི་ནུས་པ་ཡོད་ཨང་གསུངས་ནས་གདམས་ངག་དང་བླ་བོ་མང་པོ་གསན་གསུང་། དག་སྣང་གི་ལེའུ་སྟེ་བཅུ་གཉིས་པའོ།། །།
༄། །ལེའུ་བཅུ་གསུམ་པ། རྨི་ལམ་གྱི་ལེའུ།
རིན་པོ་ཆེས་སྒམ་པོར་རྨི་ལམ་དུ་ཆོས་ཐམས་ཅད་རྨི་ལམ་སྒྱུ་མ་ཙམ་དུ་གཟིགས། དེའི་དུས་སུ། བླ་མ་ལྷ་རྗེའི་ཞལ་ནས། ཁྱོད་མངོན་དགའི་འཕོ་བ་གྱིས་གསུང་། རིན་པོ་ཆེས་དགྱེས་རྡོར་ལྷ་དགུའི་དཀྱིལ་འཁོར་སྒྱུ་མ་ཙམ་དུ་མཁའ་ལ་སྤྲུལ་ནས། བླ་མ་ཉིད་ཀྱང་ལྷ་དགུར་བྱས་ནས། ནམ་མཁའི་ལྷ་སྤྲུལ་པའི་ཐུགས་ཀར་ཐིམ་པར་བྱས། ཙོ་རི་ལ་སོགས་ལྷ་མོ་བརྒྱད་ཀྱང་། ཛཿཞེས་བརྗོད་པས་བདག་ལ་བསྡུས་ནས་ནམ་མཁའ་ལ་ཡལ་བར་བྱས་པས་བླ་མ་ལྷ་རྗེ་དགྱེས་ནས་མཐུན་གྱུར་གསུངས། ཡང་རིན་པོ་ཆེས་རྨི་ལམ་དུ། ཁ་ཆེའི་གྲོང་ཁྱེར་གྲིབ་གཏན་གཟིགས་པར་བཞེད་ནས་སྐུ་བརྒྱ་སྟོང་དུ་མར་སྤྲུལ་ནས་
1-2-29b
༼ངང་༽པ་དང་སེང་གེའི་ཁྲི་ལ་བཞུགས་ནས་མཁའ་ལ་གཤེགས་ཏེ། གྲིབ་གཏན་གྱི་སྟེང་དུ་བྱོན་པའི་ཚེ། སྐྱེ་བ་མེད་པའི་སྒྲ་སྙན་པ་མང་པོ་ཐོས་གསུང་། ལན་ཅིག་ཏོང་ཀུན་བལྟ་བར་འདོད་པ་དང་སེ་ཚ་མཁར་དུ་སླེབ་པ་དང་། དགེ་བཤེས་ཤེས་རབ་བླ་མ་ཕྱུག་པོའི་བུར་སྐྱེས་པས་ངོ་ཤེས་སམ་མི་ཤེས་སྙམ་ཙ་ན། ཁོང་དགོད་པ་དང་དགའ་བའི་རྟགས་ཤེས་པར་བྱུང་གསུང་། ཡང་རྨི་ལམ་དུ་བྲག་བརྩེགས་མ་བརྒྱའི་ཁ་ལ་བླ་མ་བདེ་བའི་ཉམས་ཀྱིས་བཞུགས་པའི་ཚེ། མཁའ་འགྲོ་མ་རུས་པའི་རྒྱན་ཅན་བརྒྱད་ཀྱིས་མེ་ཏོག་ཕྲེང་བ་ཕྱག་དུ་ཕུལ་བ་རིན་པོ་ཆེས་མཁའ་ལ་གཏོར་བས། རིན་ཆེན་པད་བརྩེགས་ཁང་པར་གྱུར། དེར་ཕྱུང་ནས་རྟ་དང་སེང་གེ་སྤྲུལ་ནས་ཞོན་ནས་ཕྱིན་གསུང་། ཡང་རིན་པོ་ཆེ་བྱང་ལམ་ན་མར་བྱོན་དུས་སུ་རྨི་ལམ་ན་བུད་མེད་ཚོན་མོ་གཅིག་གི་རོ་རྙེད་པ་བཤས་པ་ལས་རྩིབ་རྩ་ནས་ཌཱ་མ་རུ་མང་པོ་བྱུང་པ་རང་སྒྲ་གྲགས་སུ་ནམ་མཁའ་ལ་ཐལ་བའི་ཟླ་ལ་རིན་པོ་ཆེ་ཡང་བཞུད་པས་ཨུ་རྒྱན་དུ་བྱོན་པ་ལ། བུད་མེད་གཅིག་གིས། འདི་ཡན་ཆད་ནི་ཡེ་ཤེས་ཀྱི་མཁའ་འགྲོ་མའི་གླིང་ཡིན། འདི་མན་ཆད་ནི་འཇིག་རྟེན་གྱི་མཁའ་འགྲོ་མའི་གླིང་ཡིན་ཟེར་ནས་རྗེས་སུ་བསྟན་པའི་གདམས་པ་གསན་གསུང་། གྲུ་བཞི་རུ། སྦྲུལ་ཆེན་པོ་གཅིག་གིས་མིད། མཐེབ་ཆེན་ལུས་པ་རྨིས། ཕག་རི་ཁར་ཐོག་བབས་པ་ལ་སྡིགས་མཛུབ་བྱས་
1-2-30a
༄༅། །པས་བཟློགས། སྐམ་པོར། གཟའ་ར་ཧུ་ལ་མདུན་ན་ཕར་འགྲིམས་པ་བཟློགས། གནས་ནང་ན་རྨི་ལམ་དུ། རྒྱ་གར་གྱི་རི་བྱ་སྐྱིབས་ན་བླ་མ་ལྷ་རྗེ་བཞུགས་པ་དང་མཇལ་ནས། བླ་མ་རྫུས་སྐྱེས་ལགས་སམ་ཞུས་པས་མངལ་སྐྱེས་ཡིན་གསུང་། དེ་ནས་ཆོས་ཞུས་པ་ལ། སྐྱེས་པའི་ཡུལ་དེ་སྤངས་ན་ཆགས་སྡང་བྲལ་བར་ངེས། །ཚུལ་ཁྲིམས་དོན་དང་ལྡན་ན་བདེ་འགྲོ་ཐོབ་པར་ངེས། །ཐབས་ལ་ནན་ཏན་བྱས་ན་ལམ་དེ་ཐོབ་པ་ངེས། །མ་བཅོས་རང་སར་བཞག་ན་དོན་དེ་རྟོགས་པར་ངེས། །ཅེས་གསུང་། ཡང་རྨི་ལམ་ན། དཀའ་ཐུབ་ཀུ་ཤ་དཀར་པོ་གཅིག་བྱུང་པ་ལ་སངས་རྒྱས་ལ་ཆོས་ཉན་དུ་ཨེ་འདོང་ཟེར་བ་ལ༑ མར་མེ་མཛད་དང་ཤཱཀྱ་ཐུབ་པ་ནི་མི་བཞུགས་དགོངས་ནས། བྱམས་པ་ཡིན་ནམ་བྱས་པ་ལ་ཡིན་ཟེར། ཉི་མའི་འོད་ཟེར་གཅིག་བྱུང་པའི་སྟེང་དུ་བཞུད་ནས་དགའ་ལྡན་དུ་བྱོན། བྱམས་པ་ལོངས་སྤྱོད་རྫོགས་སྐུའི་ཆ་བྱད་དུ་བཞུགས་ནས། དགེ་སློང་དཀར་པོ་མང་པོ་ལ་ཆོས་གསུང་ཞིང་འདུག་པ་ཁོང་གིས་ཀྱང་ཉན་པ་ལ། འདི་ལ་བསལ་བར་བྱ་བ་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ན་རྣམ་པར་གྲོལ། །ལ་སོགས་པའི་ཟབ་དོན་མང་པོ་གསུངས། ཡང་རྨི་ལམ་དུ། ནུབ་ཕྱོགས་ན་ཕར་བཞུད་པ་ལ་འཇའ་ཚོན་གྱི་གུར་ཁང་གི་ནང་དུ་ཐུགས་རྗེ་ཆེན་པོ་ཞལ་བཅུ་
1-2-30b
གཅིག་པ་བཞུགས་ནས་སྣང་པས། སྨན་གྱི་རིལ་བུ་མང་པོ་བྱིན། འདི་ཀུན་གཞན་ལ་བྱིན་དང་ཕན་ཟེར་བ་རྨིས་གསུང་། ཡང་རྨི་ལམ་དུ། མཚོའི་ནང་དུ་པདྨའི་སྟེང་ན་རིན་པོ་ཆེ་དགྱེས་རྡོར་ཡབ་ཡུམ་དུ་བཞུགས་པ་ལ་ཕྱོགས་བརྒྱད་ནས་དགྱེས་རྡོར་གྱི་ལྷ་མོ་བརྒྱད་ཀྱིས་པི་ཝང་སྦྲེང་བའི་སྒྲ་ལས། ནུབ་ཀྱི་ཕྱོགས་ན་བདེ་བ་ཆེ། ཞེས་སྤྱན་འདྲེན་འཆི་རྟགས་ཡིན་ཏེ་བཟློག་པ་ལ་ཚེགས་མ་བྱུང་གསུང་། ལན་ཅིག་བལ་ཡུལ་དུ་བཞུད་པར་འདོད་ཚེ་དགྱེས་རྡོར་གྱི་ལྷ་མོ་བརྒྱད་ཀྱིས་ཁྱོད་ད་དུང་མ་འགྲོ་ཞེས་ཕྱོགས་ཐམས་ཅད་ནས་སྤྱན་ཕྱེ་ཡང་སྣང་གསུང་། གནས་ནང་དུ་ལག་སོར་གྱི་ཉ་ལ་བླ་མའི་མཆོད་པ་བྱས། སྲོད་ལ་བླ་མ་ལ་གསོལ་བ་བཏབ་པ་ལ། ཐོ་རངས་རྨི་ལམ་དུ། བླ་མ་ལྷ་རྗེ་བྱོན་ནས་ཆོས་གསུངས་པས་མགུར་དུ་བཞེངས་པ་ནི། ཁར་སར་ལག་སོར་ཉ་དུས་སུ། །སྲོད་ལ་རྗེ་ལ་གསོལ་བ་བཏབ། །ཐོ་རངས་གཉིད་ཀྱི་རྨི་ལམ་དུ། །རྗེ་བཙུན་མདུན་དུ་བྱོན་པ་གསལ། །རྗེ་ཡི་ཐུགས་དགོངས་རྫོགས་པའི་ཕྱིར། །གསུམ་ལ་མཆོད་པ་བྱེད་དུས་སུ། །རྗེ་ཡི་ཞལ་ནས་འདི་སྐད་གསུང་། །རིག་པ་མཐའ་བྲལ་ལྟ་བར་གོ །གཉུག་མ་འགྱུར་མེད་བསྒོམ་པར་གོ །ཆགས་མེད་རྒྱུད་ཞི་སྤྱོད་པར་གོ །དེ་གསུམ་དབྱེར་མེད་འབྲས་བུར་གོ །དེ་རང་དོན་ཆོས་སྐུ་ཡིན་པར་གོ །ད་གཞན་དོན་ཕྲིན་ལས་ཇི་ལྟར་མཛད། །ཞེན་པ་མེད་པའི་སྦྱིན་པ་
1-2-31a
༄༅། །ཐོངས། །གནོད་པ་མེད་པའི་ཚུལ་ཁྲིམས་བསྲུངས། ཁོང་ཁྲོ་མེད་པར་བཟོད་པ་བསྒོམས། །སྙོམ་ལས་མེད་པར་བརྩོན་འགྲུས་རྩོམས། །ཡེངས་པ་མེད་པར་བསམ་གཏན་བསྒོམས། །བདེ་ཆེན་སྤྲོས་བྲལ་གྱི་ཡེ་ཤེས་བསྐྱེད། །དེ་དྲུག་འགྲོ་བའི་དོན་དུ་བསྔོས། །ཅེས་གསན། མཚུར་ཕུར་ནུབ་གཅིག་རྨི་ལམ་དུ། ཁ་ཆེའི་གྲོང་ཁྱེར་སུ་རིག་གི་ཞབས་ན། རྒྱ་གར་གྱི་མཐའ་ཁོབ་གཅིག་དུ་བྱོན་པ་ལ་རྣལ་འབྱོར་པ་དཔོན་གཡོག་གཉིས་དང་མཇལ་ནས། བླ་མས། ཁྱེད་སུ་ལགས་དྲིས་པ་ལ། ཨིནྡྲ་བོ་དྷི་ཡིན་གསུང་། རིན་པོ་ཆེས་ཆོས་ཞུས་པས་རྗེ་བཙུན་མ་ཨུ་རྒྱན་མའི་སྒྲུབ་ཐབས་གསུངས། གཞན་ཟབ་པ་གཅིག་ཀྱང་ཞུ་བྱས་པས། རྗེ་བཙུན་མ་ཞལ་བཞི་ཕྱག་བཅུ་གཉིས་མའི་སྒྲུབ་ཐབས་ལས་ཁ་ཚར་དང་བཅས་པ་གནང་གསུང་། ཕྱིས་མདོ་བོར། ཡུམ་ལ་ཡབ་ཅན་དཔའ་མོ་སུམ་བཅུ་སོ་དྲུག་གིས་བསྐོར་བ་གཅིག་གཟིགས། འགར་སྟོན་ཧོར་པོ་དེ་འདྲ་བ་གཅིག་འབྲིར་བཅུག །བྱི་བ་ལོའི་ཚེས་གསུམ་གྱི་ནུབ་མོ་ནམ་མཁའ་ལ་འཇའ་ཚོན་གྱི་ནང་ན་བུད་མེད་གོས་དང་ཐོད་དམར་པོ་བྱས་པ་ཕྱག་རྒྱ་ལྔས་བརྒྱན་པ་འཁོར་བཞིས་བསྐོར་བ་གཅིག་ན་རེ། ཟབ་མོའི་དོན་དག་གར་དགར་མ་བཤད་གསུང་། ཕྱིས་ཞོ་འཕྲང་གི་གནས་སུ་ཚེས་ཉི་ཤུ་ལ་གཞན་ལ་ཆོས་འདིའི་བྱིན་རླབས་མཛད་དུས་སུ། བྲག་དམར་པོའི་ཤིང་གི་
1-2-31b
གསེབ་ན་སྔར་གྱི་བུད་མེད་ལྔ་པོ་ཁྲོས་ནས་འདུག ཁྱེད་སུ་ཡིན་དྲིས་པས། ངེད་ནི་སུ་ཡིན་མ་ཤེས་ན། ང་རྒྱལ་པོའི་ལྕམ་མོ་ལེགས་སྨིན་ཡིན། ཟབ་མོའི་དོན་གར་དགར་མ་བཤད་གསུང་། ཡང་གཞུར་ཉི་ཤུ་བརྒྱད་ལ། བླ་མ་ཁམས་པ་ལུང་པ་ལ་བྱིན་རླབས་མཛད་པའི་ནུབ་མོ་སྤྲིན་དཀར་པོའི་གསེབ་ན། བུད་མེད་ལྔ་ཁྲོ་ཞིང་ཟབ་མོའི་དོན་གར་མ་བཤད་བྱས་པ་ལ་མི་ཉན་གསུང་ནས་བཞུད་དོ། །ཡང་མཚུར་ཕུ་ན། བྱི་བ་ལོའི་སྦྲུལ་ཟླའི་ཡར་ཚེས་གཅིག་གི་ནུབ་མོའི་རྨི་ལམ་ན། ལྷོ་ནུབ་ན་གཟིགས་ནས་བཞུད་ཙམ་ན། བར་སྣང་ན་ཚུར་འབྲུག་གཅིག་གྲག་ནས་ལྟས་པས། འོད་ཕུང་གི་ནང་ན་རྣལ་འབྱོར་པ་དུར་ཁྲོད་ཀྱི་རྒྱན་གྱིས་བརྒྱན་པ། ཕྱག་གཡས་ན་ཅང་ཏེའུ་བསྣམས་པ་གཅིག་བཞུགས་ནས། ང་མཻ་ཏྲི་པ་ཡིན་གསུང་། དེའི་ཞལ་ནས། འཁོར་འདས་ཀྱི་ཆོས་ཐམས་ཅད་གཉིས་སུ་འདུས། ཉོན་མོངས་པ་ཅན་གྱི་ཡིད་དང་། ལྷན་ཅིག་སྐྱེས་པའི་ཡིད་གཉིས་སུ་འདུས། ཉོན་མོངས་པའི་ཡིད་ཀྱང་ལྷན་ཅིག་སྐྱེས་པའི་ཡིད་དུ་འདུས་གསུང་ནས་འཇའ་བཞིན་དུ་ཡལ་ནས་ཐལ་གསུང་། ཡང་སྦྲུལ་ཟླའི་ཉི་ཤུ་གསུམ་གྱི་ནུབ་མོ་རྨི་ལམ་ན། འོད་ཕུང་གཅིག་གི་ནང་ན་རྣལ་འབྱོར་པ་ཕྱག་གཡས་པས་མདའ་འཛིན་པ། བྱ་བྱེད་ཐམས་ཅད་གཡོན་པས་བྱེད་པ་གཅིག་གི་ཞལ་ནས། ང་ནི་སུ་ཡིན་མ་ཤེས་ན། །ང་ནི་ས་ར་ཧ་པར་གྲགས། །ཞེས་གསུང་། འོ་ན་
1-2-32a
༄༅། །གདམས་ངག་གཅིག་ཞུ་བྱས་པ་ལ། མཐའ་བཞི་དང་བྲལ་ལྟ་བ་ཡིན། །ཡེངས་པ་མེད་ན་བསྒོམ་པ་ཡིན། །དགག་སྒྲུབ་མེད་ན་སྤྱོད་པ་ཡིན། །སྤངས་ཐོབ་མེད་ན་འབྲས་བུ་ཡིན། །གསུངས་ནས་འཇའ་བཞིན་དུ་ཡལ་ནས་གཤེགས་སོ། །ཡང་ཟླ་བ་དེའི་ཉི་ཤུ་བདུན་གྱི་ནུབ་མོ་རྨི་ལམ་ན། དྭགས་ལྷ་སྒམ་པོར་བྱོན་ཙམ་ན། བླ་མ་ཉིད་ཀྱི་ཕྱག་ན་འཇའ་ཚོན་གྱི་སྣེ་གཅིག་འདུག་པ་དེ་བསྡོག་ཅིང་བཞུད་པས་དགེ་འཕྲང་གི་ཡང་དགོན་དུ་བྱོན་ཙམ་ན། བླ་མ་ལྷ་རྗེ་དང་མཇལ་ནས་སྔར་གྱི་རྨི་ལམ་རྣམས་བཤད་ཙམ་ན། བླ་མའི་ཞལ་ནས། ཆོས་ཐམས་ཅད་རྨི་ལམ་དང་རྒྱུ་མ་ལྟ་བུར་གོ་བར་གྱིས་གསུང་ཙམ་ན་རྣལ་སད་གསུང་༑ རྨི་ལམ་གྱི་ལེའུ་སྟེ་བཅུ་གསུམ་པའོ།། །།
༄། །ལེའུ་བཅུ་བཞི་པ། གཞན་གྱི་འཆི་འཕོ་དང་སྐྱེ་བ་མཁྱེན་པ།
རིན་པོ་ཆེ་ལ་བླ་མ་གོང་མ་རྣམས་འཇིག་རྟེན་གར་སྐྱེས་ཞུས་པ་ལ། བླ་མ་མར་པ་ལྷོ་ཕྱོགས་དཔལ་གྱི་རི་ལ་ཉེ་བའི་ཤྲཱི་ནཱ་ག་རའི་གྲོང་ཁྱེར་དུ་པཎྜི་ཏར་སྐུ་འཁྲུངས༑ རེས་རྣལ་འབྱོར་པར་ཡང་མཛད་ནས་འགྲོ་བ་མང་པོའི་དོན་མཛད་གསུང་། བླ་མ་ལྷ་རྗེ་ཁ་ཆེ་དང་རྒྱ་གར་གཉིས་ཀྱི་བར་ན་ཀརྨ་བ་ན་གྲོང་ཁྱེར་པདྨ་ཅན་དུ་ཞི་བའི་གོ་ཆར་མཚན་ཐོགས། རེས་དགེ་སློང་གི་ཆ་བྱད། རེས་རྣལ་འབྱོར་པར་མཛད་ནས་སྤྱོད་པ་དུ་མས་སེམས་ཅན་གྱི་དོན་མཛད་དོ། །དེ་ན་སློབ་མ་བཞི་བཅུ་སྐྱེས་ནས་སྣང་གསུང་། བླ་མ་ལྷ་རྗེ་ལ་སྤྲུལ་པ་གསུམ་ཡོད་དོ། །སྤྲུལ་པ་ནི་ནུབ་ཕྱོགས་
1-2-32b
བདེ་བ་ལ་བཀོད་པའི་ཞིང་ཁམས་ན་དྲི་མེད་གྲང་པར་མཚན་ཐོགས་པས་སེམས་ཅན་བྱེ་བ་ཙམ་པའི་དོན་མཛད། ཡང་སྤྲུལ་ནི་ཤར་མུ་ཏིག་བྱེ་བས་བརྒྱན་པ་ན་བྱང་ཆུབ་སེམས་དཔའ་དྲི་མེད་ཟླ་བར་གྲགས་པར་མཚན་ཐོགས་པས། རྒྱལ་པོ་གྲགས་པ་མཐའ་ཡས་འཁོར་བཅས་དང་སེམས་ཅན་མང་པོའི་དོན་མཛད། གྲོང་ཁྱེར་པདྨ་ཅན་དུ་བླ་མ་ལྷ་རྗེ་སྐུ་དངོས་ཡལ་ནས་རབ་འབྱམས་སྟོང་གི་འཇིག་རྟེན་གྱི་ཁམས་ན་ཨ་ཤོ་ཀ་ཞེས་རབ་ཏུ་གྲགས་གསུང་། སློབ་དཔོན་སྒོམ་པ་རྒྱ་གར་ནུབ་ཕྱོགས་གནས་ཉེར་བཞིའི་ཡ་གཅིག་ཡིན་པའི་ཡུལ་ཀོངྐ་བྱ་བར་སྐུ་འཁྲུངས། མུ་སྟེགས་ཀྱི་རྒྱལ་པོ་བཏུལ་ནས་སེམས་ཅན་མང་པོ་ལ་ཕན། སློབ་དཔོན་ཤེས་རབ་བྱང་ཆུབ་རི་བོ་བྱ་རྐང་གི་ཞོལ་ན་བཞུགས། ལོ་བརྒྱད་ནས་རབ་ཏུ་བྱུང་བསྒྲུབ་པ་ཡང་མཛད། འགྲོ་བ་མང་པོ་ལ་ཡང་ཕན་གསུང་། བླ་མ་སྤེན་ཕུག་པ་ལ་སྟོད་རྩང་པོར་དགའ་བའི་ཡེ་ཤེས་བྱ་བར་མཚན་ཐོགས། བླ་མ་དཔལ་ཆེན་པོ་ནི་བྱང་ཕྱོགས་ཀྱི་འཇིག་རྟེན་གྱི་ཁམས་མུ་ཏིག་དྲ་བས་བརྒྱན་པ་ན། དཔལ་གྱི་འབྱུང་གནས་སྦས་པར་མཚན་ཐོགས་ནས་སེམས་ཅན་མང་པོའི་དོན་མཛད། སློབ་དཔོན་ཀྲ་ར་བ་ཅོག་རོ་འབྲིང་མཚམས་ཀྱི་སྲིབས་རི་ན་ཡེ་ཤེས་འབྱུང་གནས་གྲགས་པར་མཚན་ཐོགས། སློབ་དཔོན་ཤར་བ་པ་སྟག་དུར་བ་འཛམྦུ་གླིང་གི་ནུབ་ཕྱོགས་ཟད་པ་ན། གྲོང་ཁྱེར་བདེ་ལྡན་དུ་གྲགས་
1-2-33a
༄༅། །པ་མཐའ་ཡས་སུ་མཚན་ཐོགས། སེམས་ཅན་བྱེ་བ་ཙམ་གྱི་འདྲེན་པ་མཛད། སློབ་དཔོན་པ་ཚབ་ལོ་ཙཱ་བ་ཁ་ཆེའི་གྲོང་ཁྱེར་གྲིབ་གཏན་གྱི་ཕ་རོལ་ན་པཎྜི་ཏ་རིན་ཆེན་འབྱུང་གནས་གྲགས་པར་མཚན་ཐོགས། འགྲོ་བ་མང་པོ་སྨིན་གྲོལ་མཛད། བླ་མ་རྫོགས་པ་ཁ་ཆེ་དང་ནུ་ཆེའི་མཚམས་ན་མངོན་པར་ཤེས་པ་དང་ལྡན། སྔར་གྱི་ཕྱག་རྒྱ་མ་དང་སྤྱོད་པ་མཛད་ཅིང་སེམས་ཅན་མང་པོའི་དོན་མཛད། སློབ་དཔོན་ཕྱ་པ་ཁ་ཆེའི་གྲོང་ཁྱེར་གྲིབ་གཏན་ན་པཎྜི་ཏར་སྐུ་འཁྲུངས། བླ་མ་དངུལ་ཆུ་བ་དེ་རྒྱ་ནག་ཏོང་ཀུན་རྒྱལ་པོའི་བུར་སྐྱེས། རྨི་ལམ་དུ་རི་བོ་རྩེ་ལྔར་ཞལ་མཇལ། དགེ་བཤེས་གཞུ་དོན་མོ་རི་པ་ཛམྦུ་གླིང་ཟད་པའི་མཐའ་རི་བོ་པོ་ཏ་ལའི་རྩ་ན་ཆོས་བརྡའི་སྒོ་ནས་གསུང་། འགྲོ་བ་མང་པོའི་དོན་མཛད། བླ་མ་རས་ཆུང་པ་རྒྱ་གར་བལ་པོའི་བར་ན་མཚན་རཏ་སུ་ཀར་ཐོགས་ནས་སྤྱོད་པ་སྣ་ཚོགས་མཛད། སློབ་དཔོན་ཤེས་རབ་རྡོ་རྗེ་འཕན་ཡུལ་རང་ན་སྐུ་འཁྲུངས། བཀའ་གདམས་པ་ལ་བརྟེན་ནས་བསྒྲུབ་པ་མཛད། སློབ་དཔོན་འཕགས་པ་ས་པ་བལ་ཡུལ་ཕམ་མཐིང་གི་ཕྲོལ་ན་རྣལ་འབྱོར་པ་ཕྱག་རྒྱ་མ་དང་ལྡོམ་བུ་མཛད། མཁན་པོ་ས་ཕུག་པ་རྒྱ་གར་ཤར་ཕྱོགས་ན་པཎྜི་ཏར་སྐུ་འཁྲུངས་ནས་འགྲོ་བ་མང་པོ་ལ་ཕན་གསུང་། བལ་པོའི་ཕ་རོལ་རྒྱ་གར་གྱི་ཚུར་རོལ་གྱི་རི་བྲག་གཅིག་ན་དཔལ་ལྡན་ནག་མོ་ཆེན་མོ་ལ་སོགས་པའི་མ་མོ་
1-2-33b
དྲུག་བཅུ་རྩ་བཞིའི་སྐུ་རང་བྱུང་ཡོད་པའི་སར། སློབ་དཔོན་པདྨ་ཐེངས་རེ་བྱོན་པར་འདུག །དེའི་དགོས་པ་ནི་སློབ་དཔོན་གྱིས་དེར་མ་བྱོན་ན་མ་མོ་ཀུན་གྱིས་སེམས་ཅན་ལ་གནོད་པ་བྱེད་པ་ཡིན་པར་འདུག་གསུང་༑ རྗེ་བཙུན་གྱི་ཞལ་ནས། ཡང་དུས་ཚོད་ཅིག་དུས་མཚུངས་པའི་སྔོན་གྱི་བྲམ་ཟེ་ཆེན་པའི་རྣལ་འབྱོར་པ་འགའ་དང་། བླ་མ་མིད་ལ་དང་། བླ་མ་ལྷ་རྗེ་ལ་སོགས་པའི་རྒྱུད་པའི་བླ་མ་རྣམས་དང་ཚོགས་འཁོར་གཅིག་གི་དུས་སུ་མཇལ་གསུང་། ཡང་རྗེ་བཙུན་གྱི་ཞལ་ནས། བྱང་ཆུབ་སེམས་དཔའ་ཐ་མལ་པའི་སེམས་ཀྱིས་གཞན་དོན་བྱེད་པ་མཐོང་། རྒྱལ་གྱི་གནས་བརྟན་འདྲེ་ཆུང་པ་དེ་དཔལ་ཕག་ཚང་པའི་སྐྱེ་བ་ཡིན། རྒྱ་ནག་དང་བལ་པོ་ན་ཡང་དེའི་སྐྱེ་བ་གཉིས་ཡོད་གསུང་། མི་ཉག་གི་རྒྱལ་པོ་ཆེན་པོ་དེ་རྣལ་འབྱོར་པ་མ་ཏང་ཀིའི་སྐྱེ་བ་ཡིན། དགོས་པ་ནི། ཡབ་རྒྱལ་པོ་ལ་ཕན་པ་དང་། རྒྱལ་ཁམས་དེའི་མི་རྣམས་བསོད་ནམས་ཀྱི་ལས་ལ་བཀོད་པ་དང་། རྒྱལ་པོ་བཙན་པ་ལ་སོགས་ཏེ་བཙོན་མང་པོ་བཀྲོལ་བ་རྣམས་མ་འོངས་པའི་དུས་ན་གདུལ་བྱར་གྱུར་པ་ཡིན་གསུང་། ཡང་བླ་མ་ལྷ་རྗེའི་འདས་མཆོད་ཀྱི་དུས་ན། བླ་མ་ལྷ་རྗེའི་སློབ་མ་བཞིས་སེམས་ཅན་གྱི་དོན་རླབས་པོ་ཆེ་བྱེད་པར་མཐོང་ནས་གད་མོ་གཅིག་ཤོར་བས། དགེ་བཤེས་ཤེར་འབུམ་དེ་ཅི་ཡིན་འདྲི། ནུབ་ཕྱོགས་ན་གསེར་ཀོང་ཡེ་ཤེས་སྙིང་པོ་དང་། ཡ་ཟི་སྔོན་
1-2-34a
༄༅། །མོ། ཤར་ཕྱོགས་ན་བསྒོམ་པ་ཞི་མཛེས་དང་། དྭགས་པོ་སོགས་བསྒོམ་གཉིས་གསུང་། ཡང་བླ་མ་ལྷ་རྗེའི་སློབ་མ། རིན་པོ་ཆེའི་ཡང་སློབ་མ་སྔ་ཤོས་དགེ་ཚུལ་གཅིག་དང་། ལྷོ་ཕྱོགས་ཀྱི་འཇིག་རྟེན་ན་རྒྱལ་པོ་བདེ་སྤྱོད་བཟང་པོའི་དྲུང་ན་བྱང་ཆུབ་སེམས་དཔའི་སྤྱོད་པ་བྱེད་གསུང་། སྨོན་ལམ་བླ་མ་ཁྱོད་འདི་ནས་ཚེ་འཕོས་ནས། ནུབ་ཕྱོགས་པདྨ་ཅན་དུ་མཁན་པོ་མངའ་རིས་པ་ཚེའི་རིག་འཛིན་ཐོབ་པ་དེ་མཁན་པོར་འགྱུར། སྔོན་ཡང་སྐྱེ་བ་བཞིར་པདྨ་ཅན་དུ་མཁན་སློབ་དུ་གྱུར་ཏེ། སྐྱེ་བ་འདི་དང་ལྔར་བར་མ་ཆད་པར་ཁྱོད་རབ་བྱུང་བྱས་གསུང་། གཞུ་ཡི་གྲུ་བཞི་དགོན་པ་ན་བཞུགས་དུས་སུ་ཡོན་བདག་ཀྱང་ཡིན་ལ། སློབ་མ་ཡང་ཡིན་པའི་བསྒོམ་ཆེན་གཅིག་ཤི་བ་ལ། རིན་པོ་ཆེའི་ཞལ་ནས། བསྒོམ་པ་ཕྱ་དེ་མདོ་ཁམས་ཀྱི་སྨད་འཛམ་ཡུལ་ན་སྐྱེས་གསུང་། ཕྱིས་འཛམ་ཡུལ་ན་བྱོན་དུས་ན། སྐྱེ་བོ་ཕོ་མོ་མང་པོ་ཕྱག་འཚལ་དུ་བྱུང་པ་ལ། བུ་ཚ་གཅིག་བླ་མ་ལ་མི་འཇིགས་པར་གཞན་གྱི་ཕྱག་རྟེན་ཀུན་བླངས་ནས་འབུལ་བ་གཅིག་བྱུང་། རིན་པོ་ཆེའི་ཞལ་ནས། ཕྱ་རྒན་གྱི་སྐྱེ་བ་འདི་ཡིན་གསུང་། ཕྱིས་བུ་ཚ་དེ་མགྲོན་པོའི་ཟླ་ལ་བྲོས་ནས་གནས་ནང་དུ་བྱུང་། དེར་བཙུན་པ་བྱས་གདམས་ངག་བསྟན་ནས་བསྒོམས་པས་བསྒོམ་ཆེན་གཅིག་བྱུང་པ་ལ། འཛམ་སྐྱེ་བ་གསུམ་པར་གྲགས་སོ། །གནས་ནང་ནས་ཡོས་བུ་ལོ་ལ་ཡར་བྱོན་ནས་
1-2-34b
སྦས་ཡུལ་སག་ཏིར་བཞུགས་དུས་སུ་གྲྭ་པ་ཞ་སྔའི་བཙུན་པ་གཅིག་ཤི་བའི་གྲོགས་པོས་གར་སྐྱེས་ཞུས་པ་ལ། རྩང་རོང་ན་རམ་སྟོན་དར་མ་གྲགས་ཀྱི་བུར་སྐྱེས་གསུང་། ཕྱིས་དབུས་སུ་བྱོན་དུས་ན་ཕག་ལོ་ལ་གྲྭ་པ་འགའ་རྩང་ན་བསོད་སྙོམས་ལ་སོང་པས་རམ་སྟོན་དར་མ་གྲགས་དྲིས་ནས། དེའི་གྲོང་དུ་ཕྱིན་པ་ལ། དེ་ལ་བུ་ལོ་བརྒྱད་པ་གཅིག་འདུག་པས། སྔར་རིན་པོ་ཆེས་གསུངས་པའི་དུས་ཚོད་དང་འཐུན་པས་གྲོང་པ་ཐམས་ཅད་ངོ་མཚར་དུ་གྱུར་ཏོ། །ཤར་བ་ན་བཞུགས་དུས་སུ་ཅང་མ་ནམ་མཁའ་འབར་གྱི་ནུ་བོ་ཤི་བ་གཅིག་སུམ་བཅུ་རྩ་གསུམ་ན་ལྷ་ལོངས་སྤྱོད་ཅན་ཞི་གནས་ཡོད་པ་གཅིག་ཏུ་སྐྱེས་ཟིན་གསུངས། གཞན་གྱི་འཆི་འཕོ་དང་སྐྱེ་བ་མཁྱེན་པའི་ལེའུ་སྟེ་བཅུ་བཞི་པའོ།། །།
༄། །ལེའུ་བཅོ་ལྔ་པ། གཞན་སྣང་གི་ལེའུ།
རིན་པོ་ཆེས་གྲུ་བཞི་དང་ངོས་བཟངས་སུ་བཞུགས་དུས་སུ། ཚེམས་ལས་རིང་བསྲེལ་མཆོད་རྟེན་རྡོ་རྗེ་འདྲ་བ་དང་ཚ་ཚ་འདྲ་བ་དབྱིབས་དང་ཁ་དོག་སྣ་ཚོགས་བྱོན། གཞན་གྱི་རྐྱེན་གྱིས་འཕེལ་བ་དང་གཤེགས་པ་ལ་སོགས་པ་ཡང་བྱུང་། ཁྱད་པར་དུ་ཧེ་རུ་ཀ་དང་། རྣལ་འབྱོར་མ་དང་། ཁ་སར་པཱ་ཎི་གསུམ་བྱོན། གནས་ནང་དུ་ཚེམས་དང་ཕྱག་གི་དཔུང་པ་ལས་རིང་བསྲེལ་དཔག་ཏུ་མེད་པ་བྱོན། སྦས་ཡུལ་སག་ཏེར་སྤྱན་བསྙུང་བས་དབུའི་རྩ་གཏར་བའི་སྐུ་མཚལ་ལས་རིང་བསྲེལ་མང་པོ་བྱོན། འབྲི་ཀླུང་གི་ཆེ་བར་དུ། བླ་མས་སྐུ་ཆབ་བཙགས་པའི་
1-2-35a
༄༅། །འདམ་པ་མི་གཉིས་ཀྱིས་ཁྱེར་ནས་ཚགས་བྱས་པ་ལ། མི་གཅིག་གི་རྨི་ལམ་ན་འདམ་པའི་ནང་ན་རིང་བསྲེལ་ཡོད་ཟེར་བ་རྨིས་ནས་འདམ་པ་ཆུ་སིགས་བྱས་པས་རིང་བསྲེལ་བཞི་བྱོན། དེའི་གཏམ་རྒྱུད་རིན་པོ་ཆེས་གསན་ནས་མི་དེ་ཁྲིད་ལ་ཤོག་གསུང་ནས་གདམས་ངག་བསྟན་པས་དགེ་སྦྱོར་བཟང་པོ་བྱུང་། གཞན་ཡང་སྨིན་མཚམས་དང་ཕྱག་ཞབས་དང་ཞལ་མཆིལ་དང་ཀུན་ལ། ལ་ལས་བ བ་བཏབ་ཀྱང་བྱོན་པ་དང་། ལ་ལ་ལ་བྱོན་ནས་ཕར་ནུས་པ་ཡང་བྱུང་། སྣང་བ་དག་པ་ལ་དག་སྣང་དུ་སྣང་ལ། ཐེ་ཚོམ་ཅན་ཀུན་གྱི་ལོག་རྟོག་བསལ་བའི་ཕྱིར་ཡང་སྣ་ཚོགས་བྱུང་ངོ་། །སྐམ་པོ་གནས་ནང་དུ་དགེ་བཤེས་གཉིས་དང་གྲྭ་པ་འགས་དབང་བསྐུར་ཞུས་པའི་ཆོ་གའི་སྐབས་སུ། དགེ་བཤེས་གཅིག་གིས་བླ་མ་རྡོ་རྗེ་རྣལ་འབྱོར་མར་མཐོང་ནས་གྲོགས་དེ་ལ་བསྟན། ཡང་འཛམ་སྟོན་སངས་རྒྱས་ཀྱི་ཚོགས་མཆོད་ཀྱི་གྲལ་དུ་རིན་པོ་ཆེ་བདེ་མཆོག་ཧེ་རུ་ཀར་གཟིགས་གསུང་། ཡང་བླ་མ་ལྷ་རྗེའི་འདས་མཆོད་བྱེད་པའི་མཆོད་གྲལ་དུ་རིན་པོ་ཆེ་བཞུགས་པ་ལ། དབུས་པ་བསྒོམ་ཆེན་གཅིག་གིས་ཐུགས་རྗེ་ཆེན་པོ་ཕྱག་སྟོང་སྤྱན་སྟོང་སྐུ་མདོག་སེར་པོ་གཅིག་དུ་མཐོང་བས་ནམ་མ་ལངས་ཀྱི་བར་དུ་ཕྱག་བཙལ། བསྒོམ་ཆེན་དེ་བསོད་ནམས་སྐྱེས་ནས་བླ་མ་བསམ་ཡས་པར་གྲགས་སོ། །འཛམ་ཡུལ་སོ་ཕུག་ཏུ་འཛམ་བཙུན་
1-2-35b
གཅིག་གིས་བླ་མ་ལ་གདམས་ངག་ཞུས་པའི་སྣང་བ་ལ། རིན་པོ་ཆེ་ཇོ་བོ་ཡི་གེ་དྲུག་པར་མཐོང་ནས། ཡི་གེ་དྲུག་པས་ཡི་གེ་དྲུག་པའི་མངོན་རྟོགས་བཟླས་ལུང་ཡན་ཆད་གསུངས་པའི་སྣང་བ་བྱུང་པས་དད་པ་ཐོབ་ནས་བསྒོམས་པས་ཛ་ནེ་བསྒོམ་བཟང་ཞེས་གྲགས་སོ། །ཡང་དགོན་པ་དེར་སྟོན་ཟླ་ར་བའི་ཉ་ལ་བླ་མའི་འདས་མཆོད་བྱེད་པའི་མཆོད་གྲལ་དུ་བཙུན་པ་བགྲེས་པོ་གཅིག་གི་སྣང་བ་ལ། རིན་པོ་ཆེ་བཅོམ་ལྡན་འདས་ཤཱཀྱ་ཐུབ་པ་གདན་སེང་གེའི་ཁྲི་ལ་བཞུགས་ནས་ཆོས་གསུང་བའི་སྣང་བ་བྱུང་། ལུང་སྨད་མདའ་ན་བྱོན་དུས་སུ་རྩྭ་སྤྱིལ་བའི་གྲྭ་པ་རྣམས་ཀྱིས་དབང་བསྐུར་ཞུས་པའི་ཆོ་གའི་སྐབས་སུ། བླ་མ་ལྷས། རིན་པོ་ཆེ་ལ་རྡོ་རྗེ་འཆང་དུ་གཟིགས་གསུང་། དེའི་ནུབ་གཉིས་པ་ལ་རྡོ་རྗེ་རྣལ་འབྱོར་མར་གཟིགས། ནུབ་གསུམ་པ་ལ་རྗེ་བཙུན་ཏེ་ལོ་པར་གཟིགས་གསུང་། ཟླ་སྟོད་ཁར་ས་ན་བྱོན་དུས་སུ་ཟླ་སྟོད་ཀྱི་དཔོན་ཐམས་ཅད་དེར་འཚོགས། དེའི་དུས་སུ་ཁར་ས་ན་རབ་གནས་ཞུས་པས་རྟེན་འབྲེལ་ཟློས་པའི་སྐབས་སུ་ཚོགས་པ་ཐམས་ཅད་མཐོང་སྣང་འཐུན་པར་གདུང་རྟེན་ཆེན་པོ་གཅིག་གི་བུམ་པ་ལ་རིན་པོ་ཆེ་ཉིད་ཀྱི་སྐུ་གཅིག་དང་། ཤཱཀྱ་ཐུབ་པའི་སྐུ་གཅིག་དང་གཉིས་བྱོན་པས་ཐམས་ཅད་ངོ་མཚར་དུ་གྱུར། ཁྱད་པར་དུ་ཚམ་བུ་དཔོན་རིངས་དད་པ་སྐྱེས། བསྒོམས་པས་བསྒོམ་བྱུང་བའི་ཕྱེ་མར་ལ་ནས་ཁལ་བརྒྱ་འབུལ་བ་
1-2-36a
༄༅། །བྱས་སོ། །མཚུར་ཕུ་དགོན་པར་གཙང་པ་ཚུལ་སེང་གིས་དབང་སྐུར་ཞུས་པའི་སྣང་བ་ལ། རིན་པོ་ཆེ་དགྱེས་རྡོར་ཞལ་བརྒྱད་ཕྱག་བཅུ་དྲུག་པའི་ཐུགས་ཀ་ནས་འོད་ཟེར་བྱུང་བས་དབང་བསྐུར་བའི་གྲྭ་པ་ཅི་འདུག་ལ་འོད་ཟེར་གྱི་སྣ་ཟུག་པའི་སྣང་བ་ཕྱིས་གཉིད་མ་ལོག་གི་བར་དུ་བྱུང་གསུང་། འབྲི་ཀླུང་གི་ལྕེ་བར་དུ་དགེ་འདུན་མང་པོ་གྲལ་མཛད་པའི་དབུ་ལ་རིན་པོ་ཆེ་བཞུགས་པ་ལ། སྔགས་པ་གཅིག་གིས་ཕྱག་འཚལ་བར་འདོད་པ་ལ་རིན་པོ་ཆེ་མ་མཐོང་། ཉེ་གནས་ཀུན་གྱིས་བསྟན་ཀྱང་མ་མཐོང་། ཇོ་བོ་བྱང་ཆུབ་ཀྱིས་བསྟན་ཀྱང་མ་མཐོང་ནས། ཇོ་བོ་བྱང་ཆུབ་ཡི་མུག་སྐྱེས་ནས་སྤྱན་ཆབ་བྱུང་། དགེ་འདུན་ཡོན་མཆོད་ཐམས་ཅད་ངོ་མཚར་དུ་གྱུར་ཏོ། །ཀརྨར་འདན་མ་གཅིག་ཕྱག་འཚལ་དུ་འདོད་ནས་ཡང་དགོན་དུ་འོངས་པ་ལ། རིན་པོ་ཆེ་མ་མཐོང་ནས། བླ་མ་བཞུགས་ས་ན་མཆོད་རྟེན་ད་གཅིག་མཐོང་ནས་ཕྱིར་ལོག་ནས་སོང་། ས་མདོར་གྲོ་ལྡོ་སྟོན་བཙུན་བྱ་བའི་བཀའ་གདམས་པས་སྟག་ལྤགས་གཅིག་ཐོགས་ནས་ཕྱག་འཚལ་དུ་འོངས་པ་ལ་རིན་པོ་ཆེ་མ་མཐོང་། རོགས་ཀུན་གྱིས་ཕྱག་འཚལ་ཁམས་དྲི་བྱས་ཀྱང་ཁོས་མ་མཐོང་། ཡུན་རིང་མེན་པར་མ་མཐོང་། གནས་ནང་ནས་བཞུག་བཞུགས་དུས་སུ་གནས་ནང་གི་ཤར་ཕྱོགས་ན་ཉི་མ་བཞིའི་ས་ཙམ་ན་འཛམ་སྟོན་སངས་རྒྱས་དགོན་པ་ན་འདུག་པའི་སྣང་བ་
1-2-36b
ལ༑ རིན་པོ་ཆེ་ཞབས་རྗེན་དུ་བྱོན་པ་ལ་སྟོན་པས་ཕྱག་འཚལ་ཁམས་དྲི་བྱས་ནས་གདན་བཤམས་པའི་ཚེ་བླ་མ་མི་སྣང་བར་གྱུར་ཏོ། །ཡང་ས་ཐག་རིང་བ་ཅིག་ན་སློབ་མ་གཅིག་ནད་ཀྱི་ཟུག་རྔུས་གདུངས་ནས། བླ་མ་ལ་གསོལ་བ་བཏབ་པ་ལ་བྱོན་ནས་བྱིན་རླབས་མཛད་པས་ནད་པའི་སྡུག་བསྔལ་ཞི་ནས་བླ་མ་དེ་ཉིད་དུ་མ་དམིགས་སོ། །འབྲི་ཀླུང་གི་ལྡོང་ང་འགྲ་ན་བཞུགས་དུས་སུ། ཏྲེ་རཀྟའི་བར་དབེན་པ་བསྒོམ་ཆེན་གཅིག་གིས་གསོལ་བ་བཏབ་པའི་སྣང་བ་ལ། རིན་པོ་ཆེ་བྱོན་ནས་ཆོས་གསུངས་ནས་འཇའ་བཞིན་དུ་ཡལ་ནས་ཐལ་གསུང་། མཚུར་ཕུ་དགོན་པ་ན་བཞུགས་དུས་སུ། ཏྲེ་བོ་བསྒོམ་ཆེན་གཅིག་ནད་ཀྱིས་ཤིན་ཏུ་སྡུག་བསྔལ་ནས། བླ་མ་ལ་གསོལ་བ་བཏབ་པ་ལ། དེ་ཉིད་དུ་བྱོན་ནས་ཞབས་དབང་མཛད་པ་ལ། དེས་ཕྱག་འཚལ་བར་བརྩམས་པ་ལ་ཕྱག་འཚལ་མི་དགོས་ཁྱོད་ལ་ནད་ཀྱི་བར་ཆད་མི་འོང་གསུངས་ནས་འཇའ་བཞིན་ཡལ་ནས་ཐལ་གསུང་། ཡང་དགེ་བཤེས་སུམ་པས་དགྱེས་རྡོར་དུ་གཟིགས། སློབ་དཔོན་དབྲ་སྟོན་གྱིས་འོད་ཁ་དོག་ལྔར་རེ་མོས་གཟིགས། སློབ་དཔོན་སངས་རྒྱས་ཀྱི་ཞལ་གཅིག་མའི་བྱིན་རླབས་ཞུས་དུས་སུ། ཞལ་ནས་འོད་འཕྲོ་ཞིང་ནམ་མཁའ་ལ་བཞུགས་པ་གཟིགས། ཕྱིས་འདས་ནས་ཀྱང་ཞལ་ཡང་ཡང་གཟིགས། རིན་པོ་ཆེ་འགྲོ་དོན་ལ་ཡུལ་ཁམས་ནས་དབུས་སུ་བྱོན་པས། སྟོད་ལུང་
1-2-37a
༄༅། །མཚུར་གྱི་དགོན་པ་ལྷ་ལུང་ན་བཞུགས་དུས་སུ། བྱ་ལོའི་དབྱར་ཟླ་ར་བའི་ཉིན་གཅིག་རིན་པོ་ཆེའི་ཞལ་ནས། མདང་རྒྱ་གར་གྱི་དུར་ཁྲོད་ཅིག་ན་རྒྱ་གར་གྱི་རྣལ་འབྱོར་པ་འགའི་ཚོགས་གྲལ་དུ་བྱོན་པ་རྨིས་གསུང་། དེ་དང་དུས་མཚུངས་པར་གཙང་ལ་སྟོད་ཐང་ཅུང་ཞེས་བྱ་བའི་གཙུག་ལག་ཁང་ན་གཙང་པ་སྟོན་པ་གཅིག་ཐང་བ་འདྲུབ་ཅིང་འདུག་ཙམ་ན། དེའི་སྣང་བ་ལ། ཨ་ཙ་ར་རས་རྐྱང་གྱོན་པ་ལག་ན་ཐོད་པ་ཐོགས་པ་གསུམ་དང་བོད་ཀྱི་རྣལ་འབྱོར་པ་རས་རྐྱང་གྱོན་པ་རྐང་རྗེན་དུ་འདུག་པ་ལག་ན་ཀ་པཱ་ལ་དང་སྦ་བེར་མ་ལྕག་ཐོགས་པ་དུང་གི་རྣ་རྒྱན་ཡོད་པ་ལོ་དྲུག་ཅུ་ལོན་པའི་ཚོད་གཅིག་དང་བཞི་བྱོན་༑ དེ་ནས་བོད་དེ་དང་སྟོན་པ་གཉིས་བླ་འོ་མང་དུ་བྱས། ཁྱེད་གང་ནས་བྱོན་དྲིས་པས། ངེད་རྡོ་རྗེ་གདན་ནས་འོངས། ཁ་ཆེ་ནས་སུ་ར་པ་ལྟར་ལམ་ཕྱུང་གསུང་། རྒྱ་གར་ལ་ཅི་ལ་བྱོན་བྱས་པ་ལ། རྡོ་རྗེ་གདན་གྱི་དུས་མཆོད་ལ་ཕྱིན་ཟེར། འོ་ན་བྱ་ལོའི་མཆོད་པའི་དུས་སུ་གྲུབ་ཐོབ་མང་པོ་བྱོན་པ་ཡིན་ཟེར་ན་ཁྱེད་དང་འགའ་རེ་མཇལ་ལམ་ཞུས་པ་ལ་ངེད་ཀྱིས་འདི་ལྟར་ཐོས་གསུང་། དེའི་དུས་སུ་རྒྱ་གར་ལྷོ་ཕྱོགས་ཛཱ་ལནྡྷ་རའི་གྲོང་ཁྱེར་ན་རྒྱལ་པོ་ཟླ་བ་རྣམ་པར་གནོན་པས་ཧ་ཧ་སྒྲོག་པའི་དུར་ཁྲོད་དུ་ཚོགས་ཀྱི་འཁོར་ལོ་བྱས་ནས་གྲུབ་ཐོབ་མངོན་ཤེས་དང་རྫུ་འཕྲུལ་མངའ་བ་རྣམས་ལ་གསོལ་བ་བཏབ་པ་ལ། རྒྱ་
1-2-37b
གར་གྱི་གྲུབ་ཐོབ་བཞི་བྱོན། གྲུབ་ཐོབ་ཆེན་པོ་མི་དྲ་ཛོ་གི་ན་རེ། བོད་ཀྱི་གཉིས་བྱོན་པ་དང་དྲུག་བྱོན་གསུང་། རྒྱ་གར་དང་བོད་ཀྱི་གྲུབ་ཐོབ་གང་ལགས་དྲིས་པས། རྒྱ་གར་གྱི་ཨིནྡྲ་བོ་དྷི། ཛཱ་ལནྡྷ་ར་པ། ནག་པོ་སྤྱོད་པ་བ། ཤིང་ལོ་པ་བཞི་ཡིན། བོད་ཀྱི་གཉིས་ནི། དྷརྨ་ཀཱིརྟི་དང་། དྷརྨ་ཤཱི་ལ་ཡིན་གསུང་། དེ་གཉིས་ཇི་ཙུག་ལགས་ཞུས་པ་ལ། དྷརྨ་ཤཱི་ལ་ནི་ཆོས་ཀྱི་ཚུལ་ཁྲིམས་བྱ་བ་འཆི་མེད་གྲུབ་པའི་གདམས་ངག་ཡོད་པ་ཡིན་ཏེ། མངའ་རིས་སྟོད་ན་བཞུགས། ལྷ་ཁང་གཅིག་མཛད་པ་ལ་བརྟེན་ཏེ་སེམས་ཅན་གྱི་དོན་མཛད། ཤྲཱི་དྷརྨ་ཀཱིརྟི་ནི་བོད་སྐད་དུ། དཔལ་ཆོས་ཀྱི་གྲགས་པ་ཞེས་བྱ་བ་ལམ་རྩ་དང་རླུང་ལ་བརྟེན་ནས་ཕྱག་རྒྱ་ཆེན་པོ་གཅིག་ཆོད་ཀྱི་གདམས་ངག་ཡོད་དེ་བོད་ཡུལ་གྱི་སྨད་ན་བཞུགས། ཡོངས་སུ་གྲགས་པའི་མཚན་ནི་བླ་མ་དབུ་སེ་ཞེས་བྱ་བ་ཡིན། ངེད་ཀྱང་དེར་འགྲོ་བ་ཡིན་གསུང་། སྟོན་པའི་ཞལ་ནས། བླ་མ་དབུ་སེ་དེ་སྐུ་སྙན་པ་ཤིན་ཏུ་ཆེ་བས་ང་ཡང་དེར་འགྲོ་བསམ་པ་ལ་སྐུ་ནས་བྱོན། གཤེགས་པའི་དུས་ཡིན་ཟེར་བས་ཆོས་མ་ཚར་གྱི་དོགས་ནས་འགྲོ་འདུག་གང་ཡང་མ་རེད་ཐེ་ཚོམ་དང་བཅས་པར་འགྱུར་ཏོ། །ཞེས་བྱས་པ་ལ་རྣལ་འབྱོར་པ་དེའི་ཞལ་ནས། བཟང་སྤྱོད་སྨོན་ལམ་མ་གཟིགས་སམ། །གདུལ་བྱ་གང་ཞིག་གཅིག་ཙམ་གྱི། །དོན་དུ་ཐུབ་པས་བསྐལ་པར་བཞུགས། །དེ་ཡང་མྱུར་དུ་སྨིན་མཛད་དེ། །དྲོད་
1-2-38a
༄༅། །གཤེར་ལྡན་པའི་མྱུ་གུ་བཞིན། །བྱ་བ་ཡིན་ཏེ། སངས་རྒྱས་དང་བྱང་ཆུབ་སེམས་དཔའ་རྣམས་སེམས་ཅན་གྱི་དོན་ལ་གཞན་གྱིས་གསོལ་བ་བཏབ་ན་བསྐལ་པར་ཡང་བཞུགས་པར་བཤད་པ་ཡིན་ཏེ༑ མོས་གུས་དང་མི་འབྲལ་བར་གྱིས་ལ་མྱུར་དུ་སོང་དང་ཅི་ནས་ཀྱང་ཆོས་ཚར་ནས་འོང་གསུང་། དེ་ཉིད་དུ་དགའ་བ་ཁྱད་པར་ཅན་སྐྱེས་ནས། རྣལ་འབྱོར་པ་དེ་ལ་གདམས་ངག་ཅིག་ཞུ་བྱས་པ་ལ། རྣལ་འབྱོར་པ་དེ་བཞེངས་ནས་ཐལ་བས་ཨ་ཙ་ར་གཅིག་གི་རྩ་ན་གྲོ་ག་ལ་ཡི་གེ་བྲིས་ནས་ཤོག་དྲིལ་བྱས་པ་གཅིག་བསླངས་ནས་སྟོན་པ་ལ་བཤད་པས། དད་པ་ཁྱད་པར་ཅན་སྐྱེས་པས་དེའི་དཔེ་ཡང་བྱིན་ནས། འདི་རྣམ་བཞི་རྒྱུད་གྲོལ་དང་བྱིན་རླབས་ནུས་འདོན་གྱི་གདམས་ངག་ཤིན་ཏུ་ཟབ་པ་ཡིན་པས་མི་ལ་མ་བསྟན་པར་ཟུངས་ཅིག་དང་། ཕྱིས་ཀྱང་ང་དང་ཕྲད་དེ་འོང་གསུང་བས་བཀའ་རྒྱ་དམ་པར་མཛད། དེ་ནས་སྟོན་པ་བྲང་ཁང་དུ་བཞུད་ནས་ཕྱིར་ནང་ཆོས་སྟོན་དྲང་རྩིས་བྱས་པས། ཕྱིར་ནང་བོས་ཙམ་ན། ལྷ་གཉེར་ན་རེ། ཁྱེད་རང་སོང་བའི་རྟིང་ལ་རྣལ་འབྱོར་པ་ཀུན་ཡང་སོང་ཟེར། དེར་ཕྱོགས་ཀུན་ཏུ་མི་བཏང་ནས་འདྲིར་བཅུག་པ་ལ་ཐོས་མཐོང་མེད་དེ་ལྟ་བུ་འགྲིམ་མ་མྱོང་ཞེས་ཐམས་ཅད་སྨྲ་སྐད། སྟོན་པ་ངེས་ཤེས་ཁྱད་པར་ཅན་སྐྱེས་ནས་དབུས་ན་མར་བླ་མ་དེའི་དྲུང་དུ་འོང་བའི་སྡོགས་བྱས་ནས། ཁྱི་ལོའི་དབྱར་
1-2-38b
ཟླ་འབྲིང་པོ་ལ་སྟོད་ལུང་མཚུར་ཕུའི་དགོན་པར་བྱོན། དེ་ནས་བླ་མ་རིན་པོ་ཆེ་ལ་དབང་དང་བྱིན་རླབས་དང་གདམས་ངག་ཞུས་ནས་དབྱར་མཚམས་མཛད་ཅིང་བསྒྲུབ་པ་བྱས། ནམ་ཟླ་སྟོན་སྔར་གྱི་ལོ་རྒྱུས་བླ་མས་གྲྭ་པ་འགའ་རེ་ལ་ཐོ་རེ་ཙམ་བཤད་ནས་གདའ་སྐད་པ་ལ། གོང་གི་རྣལ་འབྱོར་པ་བཞི་པོ་དེ་འདིར་བྱོན་ནམ་དྲི་བསམ་པས། ཁྱོད་ཀྱི་དེ་སང་ཙམ་བྱས་པས་ཆོག་གསུང་། དེར་ཞུ་མ་སྤོབས་སོ། །ཕྱིས་ཆུང་པ་སྟོན་པས་ད་ནི་ངེས་པར་ཐེ་ཚོམ་མེད་པར་བྱ་དགོས་སྙམ་ནས་ཁམས་པའི་གྲྭ་པ་དཔོན་གྲགས་སེང་གེ་ཁྱིམ་དུ་ཚོགས་མཆོད་གཅིག་བཤམས་ནས། རྗེ་བཙུན་པ་གདན་དྲངས་ནས། བླ་མ་སྟ་དེའུ་བ། དགེ་བཤེས་དཀོན་མཆོག་སེང་གེ །བསྒོམ་པ་ཚུལ་ཁྲིམས་རྒྱལ་པོ་ལ་སོགས་པའི་གྲྭ་པ་རྒན་ཤོས་བཅུ་ཙམ་བོས་ནས། དེའི་ཚོགས་གྲལ་དུ། རིན་པོ་ཆེ་ལ་སྔར་གྱི་མཇལ་ལུགས་རྣམས་གསུང་བར་ཞུ་བའི་གསོལ་བ་དྲག་དུ་བཏབ་པས། རྗེ་བཙུན་གྱིས་གོང་གི་མཇལ་ལུགས་རྣམས་སྟོན་པ་དང་འཐུན་པར་མཛུབ་ཚུགས་སུ་གསུང་བས་ཐམས་ཅད་ངོ་མཚར་དུ་གྱུར་ཏོ། །དེ་ནས་ཨ་ཙ་ར་གསུམ་པོ་ཇི་ཙུག་ལགས་ཞུས་པས། རྗེ་བཙུན་གྱི་ཞལ་ནས། ཨིནྡྲ་བོ་དྷི་བར་པ་དང་། ཤིང་ལོ་པ་དང་། ནག་པོ་སྤྱོད་པ་བ་དང་གསུམ་ཡིན། ཁྱོད་ལ་གདམས་ངག་བཤད་མི་དེ་ང་ཡིན། གདམས་ངག་དེ་རྣམ་བཞི་རྒྱུད་གྲོལ་བྱིན་རླབས་ནུས་འདོན་བྱ་
1-2-39a
༄༅། །བ་སློབ་དཔོན་ཨིནྡྲ་བོ་དྷི་ལ་ཞུས་པ་ཡིན། རྒྱ་གར་གྱི་དུར་ཁྲོད་དུ་ཚོགས་འཁོར་བྱས་པའི་ཚོགས་དཔོན་ནི་ནག་པོ་སྤྱོད་པ་བ་ཡིན། ཁྱོད་སྐྱེ་བ་བཞིའི་སློབ་མ་ཡིན། ད་རེས་དང་ལྔ་མཇལ། ཐེ་ཚོམ་བཅད་ནས་བསྒོམ་ལ་བཞུགས་པའི་ཕྱིར་ཕྱིན་པ་ཡིན། ཆོས་ཉན་བཤད་བྱེད་པ་ཡང་བཟང་པོ་ཡིན་ཏེ། ཆོས་བརྒྱད་ཀྱི་ཞད་ཅིག་ཡོད། བསྒོམ་དུ་འོངས་པ་ལེགས། ད་རེས་མ་མཇལ་ན་འབྱམས་ནས་འགྲོ་གསུང་༑ བླ་མ་སྟག་དེའུ་བས་སྐྱེ་བ་བཞིར་ཇི་ལྟར་མཇལ་ཞུས་པས། སྔོན་རྒྱ་གར་ན་མགར་བ་རཏྣ་ཤྲཱི་བྱ་བར་སྐྱེས་པའི་དུས་ན་ང་ཡིས་སེམས་བསྐྱེད་པའི་སློབ་མ་ཡིན། དེའི་རྗེས་ལ་གླིང་འདི་ཉིད་ཀྱི་བྱང་ཕྱོགས་དེ་བ་ན་བྱ་བར་སྐྱེས་དུས་ན་ངའི་མཁན་བུ་ཡིན། དེ་ནས་ལུས་འཕགས་པོར་མེ་ཏོག་པ་ཤེས་རབ་བཟང་པོར་སྐྱེས། ཆོས་དྲུག་ཐུན་པྲཛྙཱའི་གདམས་ངག་བྱ་བ་ཉན། སྐྱེ་བ་འདིའི་གོང་མར་རྒྱ་གར་དུ་མཐའ་ཁོབ་རྒྱ་མཚོའི་འགྲམ་ན་བྲམ་ཟེ་རྒྱལ་བ་ཤེས་རབ་བྱ་བར་སྐྱེས། ངས་དབང་བཞི་རྫོགས་པར་བསྐུར། བསྟན་བཅོས་ལ་མཁས། བསྒོམ་ལ་ཡང་བག་ཆགས་བཞག་པས། ད་ལྟ་བསྒོམ་ལ་ངེས་ཤེས་སྐྱེ་སླ་བར་བྱུང་བ་ཡིན་གསུང་། ཡང་བླ་མ་སྟག་དེའུ་བས། རྗེ་བཙུན་པ་སྤྲུལ་པ་དུ་མས་འགྲོ་དོན་མཛད་པ་ཡིན་པར་འདུག་ན། དེང་སང་འཇིག་རྟེན་གྱི་ཁམས་ན་སྤྲུལ་པ་དུ་བཞུགས་ཞུས་པ་ལ། རྗེ་བཙུན་གྱི་ཞལ་ནས། 
1-2-39b
ལར་ངེས་པ་མེད་དེ་འོན་ཀྱང་སྤྲུལ་པ་བཞིས་སེམས་ཅན་གྱི་དོན་བྱེད་པ་འདྲ། མངའ་རིས་ཀྱི་ཕ་རོལ། ཁ་ཆེའི་ཚུར་རོལ་སུ་རིག་བྱ་བའི་གྲོང་ཁྱེར་གཅིག་ན་གནས་བཞེངས་ནས་སྔར་གྱི་སློབ་མ་འདན་ཆུང་ཤི་བ་དེར་སྐྱེས་པའི་དོན་དུ་དགེ་སློང་དགེ་བའི་བློ་གྲོས་ཞེས་བྱ་བས་སེམས་ཅན་གྱི་དོན་བྱེད། ཡང་བལ་བོད་གཉིས་ཀྱི་མཚམས་ལན་དེ་བྱ་བ་ན། བླ་མ་བཻ་རོའི་དགོན་པ་ན་རྟེན་དགེ་བསྙེན་ཆོས་ཀྱི་གྲགས་པ་ཞེས་བྱ་བ་ཆོས་བརྡའི་ཚུལ་དུ་གསུངས་ནས་སེམས་ཅན་གྱི་དོན་བྱེད། རྒྱ་གར་ལྷོ་ཕྱོགས་ན་རྟེན་རྣལ་འབྱོར་པ་ཡིན། སྣང་བ་དག་པས་ཐུགས་རྗེ་ཆེན་པོར་ཡང་གཟིགས། ལ་ལས་ཐུགས་རྗེ་ཆེན་པོ་རང་ཡིན་ཟེར་བ་ཡང་ཡོད་ལར་ངེས་མེད་དུ་བཞུགས། ཤར་ཕྱོགས་ཀྱི་འཇིག་རྟེན་གྱི་ཁམས་ན་གྲུབ་ཐོབ་རྒྱལ་པོའི་ཆ་བྱད་ཅན་གྲགས་པ་མཐའ་ཡས་ཞེས་བྱ་བ་རྒྱལ་ཁམས་དེ་རྒྱལ་པོ་མིན་པས་མི་འདུལ་བས་འགྲོ་བ་མང་པོ་ལ་ཕན་པ་ཡིན་གསུང་། དེ་ལ་སོགས་པ་གཞན་གྱིས་གསོལ་བ་བཏབ་པའི་སར་ཉེ་རིང་མེད་པར་བྱོན་པ་ལ་གྲངས་མེད་དོ། །སྐམ་པོ་གནས་ནང་དུ་བཞུགས་དུས་སུ། དཔོན་ཡོན་བདག་དགོན་པ་བས་ལྷ་ཁང་གི་རབ་གནས་ལ་སྤྱན་དྲངས་ནས་རབ་གནས་མཛད་དུས་སུ། མེ་ཏོག་ལ་རྟེན་འབྲེལ་ཟློས་པའི་སྐབས་སུ། དེའི་གཉེར་པ་དཔོན་བསྒོམ་རྡོར་གྱི་སྣང་བ་ལ་མེ་ཏོག་གི་ནས་རང་འཐོར་ལ་འགྲོ་ཞིང་རྟེན་ཀུན་ལ་ཕོག་
1-2-40a
༄༅། །པར་མཐོང་ནས་གཞན་ལ་བསྟན་པས་ཐམས་ཅད་ངོ་མཚར་དུ་གྱུར་ཏོ། །ཡང་གནས་ནང་གི་ལྷོ་ཕྱོགས་ཉི་མ་གསུམ་གྱི་ས་ན་དགེ་བཤེས་ཤཱཀྱ་བལ་པོ་ཧ་ངུ་དཀར་པོའི་སློབ་མ། ནཱ་རོ་པའི་ཡང་སློབ་ཀྱི་རྣལ་འབྱོར་པ་ཆེན་པོ་གཅིག་གིས། རིན་པོ་ཆེ་སྤྱན་དྲངས་ནས་རབ་གནས་མཛད་དུས་སུ། སྐྱེ་བོ་ཕོ་མོ་ཐག་རིང་བ་ཀུན་གྱི་སྣང་བ་ལ་ལྷ་ཁང་ལ་མེ་འབར་བར་མཐོང་། ཐག་ཉེ་བས་ལྷ་ཁང་འཁོར་བར་མཐོང་༑ ནང་ན་ཡོད་པའི་ཡོན་བདག་ལ་སོགས་པས་རྟེན་ཐམས་ཅད་འགུལ་བ་དང་སྒྲ་གྲགས་པ་ཚོར། ཁྱད་པར་རྡོ་རྗེ་སེམས་དཔའི་ལུགས་སྐུ་ཆེན་པོ་གཅིག་གི་ཕྱག་གཡོན་པའི་སྲིན་ལག་གི་རྩེ་མོ་ན་ཕྱག་མཚན་རྡོ་རྗེ་སྔར་ལུགས་ཀྱི་དུས་ན་ཡོ་བས་སྲང་ཐབས་མེད་པ་དྲང་པོར་གྱུར་པ་ལ་ཐམས་ཅད་ངོ་མཚར་དུ་གྱུར་ཏོ། །ཡང་གནས་ནང་གི་ཤར་ཕྱོགས་ཉི་མ་བཞིའི་ས་ན་འཛམ་ཡུལ་ཁང་དཀར་ནག་སྨེན་ཀེ་དགེ་བཤེས་ཇོ་སྲས་ཀྱིས་རིན་པོ་ཆེ་རབ་གནས་ལ་སྤྱན་དྲངས་པའི་དུས་སུ། རྟེན་འབྲེལ་ཟློས་པའི་སྐབས་སུ། དགེ་བཤེས་ཀྱི་སྣང་བ་ལ་མཎྜལ་སྟེང་གི་མེ་ཏོག་ཆན་ཁོལ་བ་ལྟར་བྱུང་པས་ཡར་ཞིང་རྟེན་ཀུན་ལ་ཕོག་ནས་ཆགས་པ་ཀུན་གྱིས་མཐོང་ནས་ཐམས་ཅད་ངོ་མཚར་དུ་གྱུར། དགེ་བཤེས་དེས་རིན་པོ་ཆེ་ལ་ཕ་པ་ཕ་རོལ་ཏུ་ཕྱིན་པའི་ས་ལམ་དང་སྦྱར་བའི་བསྟོད་པ་ཚིགས་བཅད་ཉི་ཤུ་པས་བསྟོད། སྤྱིར་གཞན་སྣང་ལ་མེ་
1-2-40b
ཏོག་རང་འཐོར་ལ་འགྲོ་ནས་རྟེན་ལ་ཆགས་པ་དང་། རྟེན་གཡོ་འགུལ་བྱེད་པ་དང་འོད་ཕྱུང་བ་དང་། སྒྲ་གྲགས་པ་དང་། ཞ་བོ་དང་སྒུར་པོ་ལ་སོགས་པ་ལ་ཕྱག་ལྕག་བརྒྱབ་པས་དྲག་པ་དང་། ལྐུགས་པ་གདམས་ངག་གསུངས་པས་ཁ་བྱེ་བ་དང་། མི་མ་ཡིན་པའི་གནོད་པས་ཟིན་པ་ལ་གཏོར་མ་བཏང་ནས་བདེན་པ་བརྡར་བས་ཕན་པ་བྱུང་། དེ་ལྟར་དངོས་འཛིན་ཅན་རྣམས་ཀྱི་སྣང་བ་འགྱུར་ནས་ཚེ་འདིའི་བྱ་བ་བཏང་ནས་ཡང་དག་པའི་ལམ་ལ་འཁོད་པ་ནི་དཔག་ཏུ་མེད་དེ་བརྗོད་ཀྱིས་མི་ལང་ངོ་། །རྟེན་འདྲེ་ཅན་བརྒྱ་རབ་གནས་བྱེད་པ་དང་། མཛེ་པོ་དང་ཉམས་པ་ཅན་བརྒྱ་དབང་བསྐུར་ཡང་རིན་པོ་ཆེ་ལ་གྲིབ་མི་འོང་པ་ཅི་ལགས་ཞུས་པ་ལ། རིན་པོ་ཆེའི་ཞལ་ནས། གཉིས་འཛིན་གྱི་བློ་དང་བྲལ། ཆོས་ཐམས་ཅད་དུ་མ་རོ་གཅིག་ཏུ་རྟོགས་ནས་གཉུག་མ་རྒྱུན་ཆད་མེད་པའི་ངང་ལ་གནས་པའི་རྣལ་འབྱོར་པ་ལ་དངོས་པོར་གྱུར་པའི་གྲིབ་དང་གྲིབ་འབྱུང་བའི་ཡུལ་གཉིས་མེད་གསུང་། མཚུར་ཕུ་དགོན་པར་ལོ་ལྔ་བཞུགས་ནས། བྱི་བ་ལོའི་སྟོན་ཟླ་ར་བའི་ཉ་ལ་བླ་མ་ལྷ་རྗེའི་འདས་མཆོད་དུས་སུ་ཚོགས་བསོག་མཛད་ནས། དྭགས་པོ་གདན་སར་གསེར་གྱི་གླེགས་བམ་བཅོ་བརྒྱད། ཤོག་སྐྱའི་པོ་ཏི་བཅུ་གཉིས་ཏེ་དུམ་པ་སུམ་བཅུ། གཡུ་དམར་འཛམ་གླིང་གྲགས་ཤིང་སྲང་ཉི་ཤུ་རྩ་བཞི་པ་ལ་སོགས་པའི་འབུལ་བ་མཛད། སྤྱིར་
1-2-41a
༄༅། །གསུང་རབ་དུམ་པ་བརྒྱ། ནོར་སྣ་མང་པོ་སྡེ་དགོན་ཀུན་ལ་ཕུལ་ནས། རིན་པོ་ཆེའི་ཞལ་ནས། ཚོགས་པ་ཀུན་ལ་ང་མགྲོན་བྱེད་པས་ཚོགས་པ་སྐྱོང་བ་མི་འོང་། ཁྱེད་ཁམས་སུ་འགྲོའམ། བསྒོམ་གྲུར་འགྲོའམ། ཉན་པ་འདོད་དམ། གར་མོས་སུ་སོང་ཞིག་གསུང་། ཁམས་སམ་དྭགས་པོ་གདན་སའམ་མོན་བདེ་མཚམས་སུ་བཞུད་གསུང་། ལ་ལས་ཁམས་སུ་བཞུད་ཟེར། ཁ་ཅིག་བླ་མ་གདན་སར་བཞུད་ངེས་ཟེར་ནས་ཐམས་ཅད་ཐེ་ཚོམ་དུ་གྱུར་པ་ལས། ཟླ་བ་གསུམ་དུ་ནམ་མཁའ་ལ་འཇའ་དང་ས་གཡོ་བ་དང་འུར་ཐུག་གི་སྒྲ་ལ་སོགས་པ་ལྟས་ཆེན་པོ་རྒྱུན་མི་ཆད་པར་བྱུང་སྟེ། ཉེ་གནས་དང་གྲྭ་པ་རྒན་པོ་ཀུན་ན་རེ། རིན་པོ་ཆེ་གནས་ནང་ན་ཁམས་མ་བདེ་བའི་དུས་སུ་ཞུས་པ་ལ། བླ་མ་མིད་ལའི་སྐུ་ཚེ་ཙམ་ཐུབ་གསུང་བའི་ཞལ་བཞེས་ཡོད་པ་ཡིན་པས། བླ་མས་དགུང་ལོ་བརྒྱད་བཅུ་རྩ་གསུམ་བཞིར་བྱོན་པས་ད་གཤེགས་དོགས་ཡོད་ཟེར། དེ་ནས་དགུང་ལོ་བརྒྱད་བཅུ་རྩ་བཞི་ལ་གླང་གི་ལོ་གསར་སྟག་གི་ཟླ་བའི་ཚེས་གསུམ་ལ། རིན་པོ་ཆེ་སྤྲུལ་པའི་སྐུའི་དཀྱིལ་འཁོར་བསྡོགས་ནས་མཁའ་སྤྱོད་གནས་སུ་གཤེགས་སོ༑ ༑དེར་ཚེས་བཅུ་ལ་གདུང་བཞུ་བ་ལ་མཐོང་ཐོང་སྣང་དུ་མ་བྱུང་སྟེ། དེར་ཚོགས་པ་ཐམས་ཅད་མཐོང་སྣང་མཐུན་པར་ཉི་མ་སྔར་བས་ཉིས་ས་ཉིས་འགྱུར་གྱིས་རིང་བ་བྱུང་། ལ་ལས་ཉི་མ་བཅུ་གསུམ་དང་བདུན་དང་
1-2-41b
བརྒྱད་དུ་མཐོང་། ཉི་མའི་ཚོགས་འདུ་ཞིང་གྱེས་པ་དང་། ཉི་མའི་འོད་ཟེར་རྨ་བྱའི་གདུགས་འདྲ་བ་དང་། དཔའ་བོ་དཔའ་མོ་རུས་པའི་རྒྱན་ཅན་གྱིས་ནམ་མཁའི་ཁམས་གང་བ་དང་། མེ་ཏོག་གི་ཆར་འབབ་པ་དང་༑ གདུང་གི་སྟེང་ན་འཇའ་ཚོན་གྱི་གདུགས་བརྩེགས་པ་མང་པོ་སྣང་བ་དང་། མེ་སྒྲ་ལ་ངོས་བཟུང་མེད་པའི་སྒྲ་སྙན་སྣ་ཚོགས་གྲགས་པ་དང་། དུད་པ་འཇའ་ཚོན་དུ་གྱུར་པའི་ནང་ན་བླ་མ་བཞུགས་པ་མཐོང་༑ དུད་པ་ལ་བྱ་བྱེའུ་མང་པོས་བསྐོར་བ་བྱེད་པ། བྱ་རྒོད་དང་རི་དྭགས་ཀྱི་ཚོགས་མང་པོ་ལྷགས་པ་ལ་སོགས་པའི་མཐོང་སྣང་དུ་མ་བྱུང་ངོ་། །སྔར་དགེ་སྦྱོར་མེད་པ་ལ་དགེ་སྦྱོར་བྱུང་པ་དང་། དགེ་སྦྱོར་ཡོད་པ་ཀུན་ལ་བོགས་བྱུང་པ་དང་། བསྒོམ་ཆེན་ཀུན་ལ་ཏིང་ངེ་འཛིན་ངོ་མཚར་ཅན་བྱུང་ངོ་། །དེ་ནས་སེམས་ཅན་ལ་བརྩེ་བའི་ཐུགས་དང་། དམ་ཆོས་གསུང་བའི་ལྗགས་དང་། བྱང་ཆུབ་ཀྱི་སེམས་གཉིས་འབྱོངས་པའི་རིང་བསྲེལ་དང་། བསྐྱེད་རིམ་ལ་བརྟན་པའི་ལྷའི་སྐུ་ལ་སོགས་པ་མང་པོར་བྱོན་པ་རྣམས་བུ་སློབ་ལ་ཅུང་ཟད་རེ་བྱིན་ནས། གཞན་རྣམས་ལ་དཔལ་མཚུར་ཕུ་མདོ་བོ་དགོན་པར་སྐུའི་འདྲ་འབག་དང་༑ གདུང་ཁང་ཆེན་པོ་དང་། གསེར་གྱི་མཆོད་རྟེན་དཔལ་ལྡན་འབྲས་སྤུངས་ཀྱི་བཟོ་ལུགས་བཞེངས་ཤིང་རབ་གནས་རང་ཆས་སུ་ཞུགས་ཏེ་བྱིན་རླབས་ཀྱི་མཐར་ཐུག་པ་བྱུང་ངོ་། །གཞན་སྣང་གི་ལེའུ་སྟེ་
1-2-42a
༄༅། །བཅོ་ལྔ་པའོ།། །།
༄། །ལེའུ་བཅུ་དྲུག་པ། རྒྱ་གར་དུ་སྐྱེས་པའི་རབས།
སྐྱེ་བ་འདིའི་འོག་མར་གཞན་དོན་གང་དུ་མཛད་ཞུས་པ་ལ། རྒྱ་གར་གྱི་ནུབ་ཕྱོགས་ཨུ་རྒྱན་ནས་ཉིན་ལམ་བཅུ་གཉིས་ཀྱི་བྱང་ཤར་ན་ཀཱརྟི་ཀའི་གྲོང་ཁྱེར་དུ་ཡབ་དྷརྨ་སིདྷི་དང་། ཡུམ་མ་ཧཱ་པྲཛྙཱའི་སྲས་པྲཛྙཱ་ཤཱི་ལ་ཞེས་པའི་རྣལ་འབྱོར་པར་སྐྱེ། བླ་མ་ལྷ་རྗེ་ཡང་གྲོང་ཁྱེར་པདྨ་ཅན་ན་མངལ་སྐྱེས་སུ་མཚན་ཞི་བའི་གོ་ཆ་ཞེས་པར་སྐྱེ། དེའི་མུ་སྟེགས་ཀྱི་པཎྜི་ཏ་གཅིག་གིས་ཤེས་བྱའི་བདག་པོ་བྱས། བླ་མ་ལྷ་རྗེས་ཤེས་པའི་བདག་པོ་བྱས་ནས་བརྩད་པས་བླ་མ་རྒྱལ་ནས། མུ་སྟེགས་པ་དེ་ནང་པ་སངས་རྒྱས་པར་ཚུད་ནས་མིང་དྷརྨ་རཱ་ཛར་བཏགས་ནས། དེའི་མུ་སྟེགས་ཀྱི་རྒྱལ་པོ་དེའི་མིང་མ་ཧཱ་ཛི་ན་ཡིན། གྲོང་ཁྱེར་ཀཱརྟི་ཀ་ན་པཎྜི་ཏ་བོ་དྷི་བཛྲ་ཞེས་པ་ནང་ན་ཡོན་ཏན་བཟང་པོ་ཡོད་པ་ཅིག་ཡོད། བླ་མ་ལྷ་རྗེ་དང་དགེ་སློང་བསྒོམ་ར་དང་ཞི་མཛེས་དང་གར་སྟོན་དང་། གསེར་རྐོང་ཡེ་ཤེས་སྙིང་པོ་དང་༑ ཟིམ་ཤི་ཡེ་ཤེས་སྙིང་པོ་དང་། ཡ་ཛི་སྔོན་མོ་དང་། རྒྱ་ཆེ་ཆུང་གཉིས་དང་། གྲགས་མཛེས་དང་། ཉག་སྡེ་སྟོན་པ་དང་། རོག་སྒོམ་དང་། ཡོན་ཏན་སྙིང་པོ་སྟེ་རིག་པ་བརྟུལ་ཞུགས་ཀྱི་སྤྱོད་པ་ནུས་པ་དྲུག་ཡོད་པ་མུ་སྟེགས་ཀྱི་རྒྱལ་པོ་རྟོག་མེད་ཀྱི་སྒོ་ནས་བཏུལ་བ་དང་། ཡུལ་ཀཱརྟི་ཀའི་རྒྱལ་པོ་པཎྜི་ཏས་བཏུལ་བ་གཉིས་དུས་གཅིག་ཡིན། བླ་མ་ལྷ་རྗེ་དང་། ནང་པའི་པཎྜི་ཏ་དང་། མུ་སྟེགས་ཀྱི་པཎྜི་ཏ་དང་གསུམ་
1-2-42b
ཀ་རྒྱལ་པོ་དེའི་མཆོད་གནས་ཡིན། གྲོང་ཁྱེར་པདྨ་ཅན་དང་ཀཱརྟི་ཀ་གཉིས་ཀྱི་བར་ན་གྲོང་ཉུང་བ་གཅིག་ཡོད་དེ། ཡུལ་ཕྱོགས་དེ་ཐམས་ཅད་མུ་སྟེགས་པ་ཡིན་པ་ལ་མ་ལུས་པ་ནང་པ་སངས་རྒྱས་པ་བྱས། གྲོང་ཁྱེར་དེ་གཉིས་ཀྱི་བར་ན་ཉིན་ལམ་གཉིས་ཙམ་ཡོད། ང་དང་བླ་མ་ལྷ་རྗེ་ཡང་མཇལ། ཡོན་བདག་དགོན་པ་བ་ཡང་དེ་ན་བློན་པོ་གཅིག་གི་བུར་སྐྱེས་ནས་རབ་བྱུང་བྱས། ཁྱོད་འགའ་ཡང་གྲོང་ཁྱེར་ཀན་པར་སྐྱེ་སྟེ༑ ཡོན་ཏན་འོད་དང་། དགེ་འདུན་འོད་དང་། སྨོན་ལམ་བླ་མ་དང་། ཡེ་ཤེས་འོད་དང་། སྟོན་པ་ཚུལ་སེང་དང་། དགེ་འདུན་གྲགས་དང་། ཁྱེད་བདུན་ལྷན་ཅིག་ཏུ་རྗེའུ་ཡི་རིགས་སུ་སྐྱེ། གྲོང་ཁྱེར་དེ་གསུམ་ཡང་ཕྱོགས་གཅིག་གི་ཐབས་སུ་ཡོད། གཞན་ཡང་ཡུལ་ཕྱོགས་དེར་སློབ་དཔོན་རིན་ཆེན་རྒྱལ་མཚན་དང་། སྟོན་པ་སངས་རྒྱས་དང་། སྟོན་པ་བྱང་གྲགས་དང་། སྟོན་བསོད་དང་། དཔོན་དར་མ་རཱ་ཛ་དང་། ཤཱཀྱ་ཤེས་རབ་དང་། སྒོམ་རྔོན་དང་། རྡོ་རྗེ་འབུམ་དང་། དགེ་བཤེས་རིན་གྲགས་དང་། དབང་ཕྱུག་གྲགས་དང་། འོད་ཟེར་བླ་མ་དང་། ཡོན་ཏན་བླ་མ་དང་། དར་མ་སེང་གེ་དང་། རྡོ་རྗེ་བརྩོན་འགྲུས་དང་། བྱང་པ་ལྷ་བཟོ་ལ་སོགས་པ་ཁྱེད་མང་པོ་བླ་མ་ལྷ་རྗེ་དང་མཇལ་རྒྱུ་ཡིན་པ་ལ་མ་མཇལ་ཏེ། སྐྱེ་བ་ཕྱི་མ་ལ་མཇལ་ནས་འོང་གསུང་། རྒྱ་གར་དུ་སྐྱེས་པའི་རབས་ཏེ་ལེའུ་བཅུ་དྲུག་པའོ།། །།
༄། །ལེའུ་བཅུ་བདུན་པ། ལྷོ་བྲག་དུ་སྐྱེས་པའི་རབས།
དེའི་ཕྱི་མ་ལ་གར་
1-2-43a
༄༅། །བཞུད་ཞུས་པས། བོད་ཡུལ་དབུས་སུ་ལྷོ་བྲག་གྲུབ་པའི་གནས་བདུན་ཞེས་པར་སློབ་མ་གཅིག་གི་དོན་དུ་སྐྱེ་སྟེ། ཡུན་རིང་པོ་མི་བཞུགས། ཁྱེད་འགའ་དང་དེར་འཕྲད་གསུང་། ལྷོ་བྲག་དུ་སྐྱེས་པའི་རབས་ཏེ་ལེའུ་བཅུ་བདུན་པ་འོ།། །།
༄། །ལེའུ་བཅོ་བརྒྱད་པ། ཤར་ཕྱོགས་ཀྱི་འཇིག་རྟེན་གྱི་ཁམས་སུ་སྐྱེས་པའི་རབས།
དེའི་ཕྱི་མ་ཞུས་པས། ཤར་ཕྱོགས་ཀྱི་འཇིག་རྟེན་གྱི་ཁམས་ཅིག་ན། རྒྱ་གར་ལྷོ་ཕྱོགས་ཨུ་རུ་པ་ཞེས་པར། མཁའ་འགྲོ་མའི་གནས་ཀོངྐ་བྱ་བ་ཡོད་པ་དེར་སྐྱེ། ས་ཕྱོགས་དེ་ན་པ་ཏ་ལ་ཞེས་པའི་གྲོང་ཁྱེར་དུ། ཡོན་བདག་དགོན་པ་བ་རྒྱལ་པོར་སྐྱེས་ནས་ལམ་རྣལ་མ་ལ་དེར་གདོད་ཆུད། ཁྱེད་རྣམས་དང་ཡང་དེར་ང་དང་མཇལ་ནས། བཟོད་ང་མི་དགོས་པ་མང་པོ་ཡང་འབྱུང་༑ འགྲོ་བ་གཞན་མང་བ་ལ་ཡང་ཕན་པར་འདུག་གསུང་། དེ་ལྟ་བུའི་སྤྲུལ་པ་སྣ་ཚོགས་ཀྱི་གཞན་དོན་མཛད་པ་ནི་སེམས་ཅན་རྣམས་ཀྱི་ལས་མ་ཟད་ཀྱི་བར་དུ་ནོར་བུ་རིན་པོ་ཆེ་ལྟར་འབྱུང་སྟེ་བརྗོད་པ་དང་བྲིས་པས་མི་ལང་ངོ་། །ཤར་ཕྱོགས་ཀྱི་འཇིག་རྟེན་གྱི་ཁམས་སུ་སྐྱེས་པའི་རབས་ཏེ་ལེའུ་བཅོ་བརྒྱད་པའོ།། །།སེམས་དཔའ་ཆེན་པོའི་སྐྱེས་རབས་གསེར་གླིང་འདི། །གུས་བཅས་སྐྱེས་བུས་གཅེས་སྤྲས་མཛོད་ཅིང་ལྟོས། །འགལ་གྱུར་བློ་རྒྱ་ཆུང་ནི་བཟོད་པར་རིགས། །དགེ་བས་འགྲོ་ཀུན་ཆོས་རྗེའི་གདུལ་བྱར་ཤོག །ཆོས་རྗེའི་སྐྱེས་རབས་རིན་པོ་ཆེ་གསེར་གླིང་ལེའུ་བཅོ་བརྒྱད་པ་ཞེས་བྱ་བ་བླ་མ་སྲས་བཅས་
1-2-43b
ཀྱི་གསུང་སྒྲོས་ཐོར་བུ་རྣམས་བསྡུས་པ། དེའི་གསུང་ལ་ཚད་མར་འཛིན་པ་སྒང་ལོས་མཚུར་དོ་བོ་དགོན་པའི་རྒྱན་དུ་བྲིས་པའོ།། །།
